Bugun Sportni rivojlantirish vaziri Adham Ikramov O‘zbekiston futbol assosiasiyasida bo‘lib, amalga oshirilayotgan ishlar bilan yaqindan tanishdi.
Tashrif davomida Adham Ilhomovich O‘zbekiston terma jamoalarining joriy yilgi rejalari bilan qiziqdi. Bolalar-o‘smirlar va ayollar futbolini rivojlantirish borasidagi ishlar va yaqin kelajakdagi musobaqalar borasida mutaxassislar bilan suhbatlashdi.
Shuningdek, O‘FA rahbariyati bilan Sportni rivojlantirish vazirligi va O‘zbekiston futbol assosiasiyasi o‘rtasida hamkorlikning samaradorligini yanada oshirish bo‘yicha fikr almashildi. Adham Ilhomovich O‘zbekiston so‘nggi paytlarda futbol bo‘yicha bir qancha xalqaro musobaqalarga mezbonlik qilayotgani va ularni namunali o‘tkazayotganini e’tirof etdi. Bundan tashqari, joriy yilning iyun oyida yurtimiz maydonlarida bo‘lib o‘tadigan U-23 Osiyo kubogi haqida to‘xtalib, musobaqa tashkiliy qo‘mitasiga kuch-g‘ayrat tiladi va vazirlik har qanday yordamga tayyor ekanligini bildirdi.
Adham Ikramov tashrif davomida O‘FA tomonidan o‘tkazilayotgan “Sport jurnalistlari kubogi-2022” musobaqasini kuzatib, tashkiliy ishlarga yuqori baho berdi va bir qator sport jurnalistlari bilan yaqindan suhbatlashdi.
