Бугун Спортни ривожлантириш вазири Адҳам Икрамов Ўзбекистон футбол ассоциациясида бўлиб, амалга оширилаётган ишлар билан яқиндан танишди.
Ташриф давомида Адҳам Илҳомович Ўзбекистон терма жамоаларининг жорий йилги режалари билан қизиқди. Болалар-ўсмирлар ва аёллар футболини ривожлантириш борасидаги ишлар ва яқин келажакдаги мусобақалар борасида мутахассислар билан суҳбатлашди.
Шунингдек, ЎФА раҳбарияти билан Спортни ривожлантириш вазирлиги ва Ўзбекистон футбол ассоциацияси ўртасида ҳамкорликнинг самарадорлигини янада ошириш бўйича фикр алмашилди. Адҳам Илҳомович Ўзбекистон сўнгги пайтларда футбол бўйича бир қанча халқаро мусобақаларга мезбонлик қилаётгани ва уларни намунали ўтказаётганини эътироф этди. Бундан ташқари, жорий йилнинг июн ойида юртимиз майдонларида бўлиб ўтадиган У-23 Осиё кубоги ҳақида тўхталиб, мусобақа ташкилий қўмитасига куч-ғайрат тилади ва вазирлик ҳар қандай ёрдамга тайёр эканлигини билдирди.
Адҳам Икрамов ташриф давомида ЎФА томонидан ўтказилаётган “Спорт журналистлари кубоги-2022” мусобақасини кузатиб, ташкилий ишларга юқори баҳо берди ва бир қатор спорт журналистлари билан яқиндан суҳбатлашди.