Pro-liganing 2-turidan o‘rin olgan «Turon» — «Aral Samali» (3:0) uchrashuvidan so‘ng mehmonlar klubi bosh direktori Islombek Seytnazarov matbuot anjumanida ishtirok etdi.

— O‘yin haqida.
— Bugun yaxshi uchrashuv bo‘ldi. Xabaringlar bor, biz sun’iy maydonlarda o‘yin o‘tkazamiz. Bugun haqiqiy maysaga ega bo‘lgan jamoada futbolchilarimiz bir oz qiynalishdi. Ikkinchi bo‘limda maydonga moslashib oldik va o‘yinimiz birmuncha kuchaydi. «Turon» jamoasini g‘alaba bilan tabriklaymiz, navbatdagi o‘yinlarda jamoaga omad yor bo‘lsin.

— Tajribali futbolchi Navro‘zbek Alimovning zaxiraga olishining sababi nima?
— Biz chempionat boshlanishiga 10 kun qolganda yig‘inlarga kirishdik. Toshkent shahrida bir haftalik yig‘in o‘tkazdik. Navro‘zbek Alimovning hozirda jismoniy imkoniyati to‘liq 90 daqiqani o‘tkazishga imkon bermaydi. Shuningdek, unda tizzasidan olgan jarohati bor. Shu sababdan biz uni zaxiraga olishga majbur bo‘ldik. Albatta, keyingi o‘yinlarga yanada tiklanib boradi va unga ko‘proq daqiqa o‘ynashga imkoniyat beramiz.

— Nega jamoa bosh murabbiyi Timur Turdiyev bugungi uchrashuvda qatnasha olmadi?
— Bosh murabbiy Timur Turdiyev hozirda PRO lisenziyasi uchun o‘quv kurslarida ishtirok etmoqda. Shu sababdan bugungi o‘yinda qatnasha olmadi. Nasib bo‘lsa, bosh murabbiy keyingi o‘yinlarda jamoamizga yaqindan yordam beradi.

Shu o‘rinda «Turon» futbol klubi rahbariyatiga aytmoqchi bo‘lgan fikrlarim bor edi. «Turon» juda ajoyib jamoa, Yaypanga kelib o‘z ko‘zimiz bilan tanishib yana bir bor bunga guvoh bo‘ldik. Shu kabi sharoitlarga ega jamoa shakllantirganliklari uchun klub rahbariyatiga minnatdorchilik bildiraman.