Turinning «Yuventus» klubi rahbariyati yozgi transfer bozorida amalga oshirish kerak bo‘lgan ishlarni boshlab yubordi.
Paulo Dibala bilan yangi shartnoma hali imzolanmadi, shuning uchun turinliklar argentinalik futbolchining o‘rniga boshqa o‘yinchi izlashga qaror qilishdi.
Italiyalik jurnalist Fabrisio Romanoning tarqatgan ma’lumotiga qaraganda, «Keksa sinyora» «Sassuolo» jamoasining hujumkor futbolchisi Xamed Traorega e’tibor qaratishmoqda.
Transfermarkt portali futbolchining transferini 18 million yevroga baholamoqda.
Traore joriy mavsum A Seriyada 24 ta o‘yin o‘tkazib, beshta gol kiritdi va to‘rtta golga assistentlik qildi.
