Prezident Shavkat Mirziyoyevning 2021 yil 5 noyabrdagi «Sport-ta’lim muassasalari faoliyatini 2025 yilgacha rivojlantirish dasturi to‘g‘risida»gi qarori hamda Olimpiya o‘yinlarida g‘olib va sovrindor bo‘lgan o‘zbekistonlik sportchilar faoliyatini keng targ‘ib etish maqsadida gimnastika bo‘yicha Oksana Chusovitina va boks bo‘yicha Bahodir Jalolov sport mahorat maktabtlarini tashkil etish bo‘yicha prezident qarori e’lon qilindi. Bu haqda Sportni rivojlantirish vazirligi ma’lum qildi.

Qarorga ko‘ra, har ikki maktab 2022/2023 o‘quv yilidan o‘z faoliyatini boshlaydi. Gimnastika maktabida 1—11-sinf o‘quvchilaridan iborat 165 nafar, boks maktabida esa 5—11-sinf vakillaridan 175 nafar o‘quvchi tahsil oladi. Mahorat maktabi o‘quvchilarini umumta’lim dasturlari bo‘yicha o‘qitish ularga eng yaqin joylashgan umumiy o‘rta ta’lim maktablarida amalga oshiriladi.

Maktablarni tashkil etish uchun davlat byudjetidan 50 milliard so‘m (har ikkisi uchun 25 milliard so‘mdan) ajratiladi.

Gimnastika maktabi Toshkent shahar, Mirobod tumanida joylashgan 175-son umumiy o‘rta ta’lim maktabiga tutash hududda barpo etiladi. Boks maktabi esa Toshkent shahar, Yunusobod tumani, 9-mavzeda joylashgan 259-son umumiy o‘rta ta’lim maktabi hududida tashkil etiladi.