“Andijon” matbuot xizmati tomonidan tashkil qilingan “Yulduzlar biz haqimizda” rukni davom etadi.

Quvonarlisi, mazkur tashabbusga qo‘l urganimiz aksariyat muxlislar tarafidan ijobiy qarshi olinmoqda va ular uchun sevimli jamoamiz haqida ko‘zga ko‘ringan futbol shaxslarining bildirayotgan munosabatlari juda qiziq tuyulyapti.

Demak, bugungi mehmonimiz bilan tanishing: “Paxtakor” klubi hamda O‘zbekiston milliy terma jamoasi a’zosi – Sardor Rashidov!

Barcha yaxshi biladiki, bu futbolchi yurtimizda shuningdek, “Bunyodkor” va “Lokomotiv” jamoalari sharafini ham himoya qilgan. O‘zi esa Jizzax futboli tarbiyalanuvchisi. Legioner sifatida Qatarning “Al-Jayish”, “Qatar SK” klublarida samarali faoliyat olib borgan. Bundan tashqari, u BAAning “Al-Jazira”, Portugaliyaning “Nasyonal” va Quvaytning “Al-Quvayt” jamoalarida ham to‘p surgan.

Rashidov “Andijon” matbuot xizmatiga klubimiz haqida quyidagilarni aytdi:

- “Andijon” klubi haqida birgina men emas, barcha o‘zbekistonlik ishqibozlar ham yaxshi bilishadi. Bu klub juda muxlislarbop jamoa. Qolaversa, Andijon shahrini ham futbol shahri deb bilaman. Klub stadioni ham yaxshilanib, chiroyli ko‘rinishga kelib qolibdi.

Pro ligada “Andijon” klubiga omad tilaymiz. Keyingi yili Superligaga chiqishiga tilakdoshmiz. Shu bois jamoaning barcha a’zolariga hamda uning ashaddiy muxlislariga muvaffaqiyat yor bo‘lishini tilab qolaman.

Rosti, “Andijon”ni Superligada ko‘rishdan juda xursand bo‘lardik. Chunki bu klub yaxshi tashkillangan, chiroyli o‘yin namoyish etadigan tomoshabop jamoa hisoblanadi. Yana shuni ham bilamanki, Andijondan yetishib chiqayotgan iste’dodli futbolchilar bor. Keyingi yili “Andijon”ni Superligada kutib qolamiz!, - deya fikr bildirdi Sardor Rashidov.