Qozog‘istonning Almati shahrida gandbol bo‘yicha 18 yoshgacha bo‘lgan qizlar o‘rtasida IX Osiyo chempionati bahslari o‘z yakuniga yetdi. Dunyoda pandemik vaziyat hanuzgacha barham topmagani bois musobaqada atigi 5ta jamoa qatnashdi.

Davraviy tizimda o‘tkazilgan ushbu qit’a chempionatida 2004 yilda tug‘ilgan qizlarimizdan iborat O‘zbekiston terma jamoasi Osiyoda faxrli 3-o‘rinni qo‘lga kiritdi.

Qizlarimiz musobaqadagi ilk o‘yinini Eron terma jamoasiga qarshi o‘tkazishdi. Murosasiz kechgan bahsda 44:35 hisobida eronlik qizlarning qo‘li baland keldi.

Keyingi o‘yinlarda hamyurtlarimiz Hindiston terma jamoasini 44:41 hamda suriyalik tengqurlarini 37:28 hisoblarida mag‘lub etishdi.

Biroq, kumush medal uchun musobaqa mezbonlari Qozog‘iston terma jamoasiga qarshi kechgan o‘yinda qizlarimizga biroz omad yetishmadi. Shu tariqa ular 3-o‘rin hamda bronza medalini qo‘lga kiritishdi. Eron U-18 jamoasi esa oltin medalga sazovor bo‘ldi.

Biz uchun quvonarli jihatlardan biri, nukuslik qizimiz Sarvinoz Saparbayeva ushbu Osiyo chempionatining eng yaxshi o‘yinchisi deb topildi va maxsus sovrin bilan taqdirlandi.