Turkiyaning «Fenerbaxche» klubi yarim himoyachisi Mesut O‘zil asosiy jamoadan chetlatilganini tasdiqladi.
“Dam olish kunlari Germaniyaga bordim. Turkiyaga qaytayotganimda klubga qo‘ng‘iroq qilib mashg‘ulot uchun soat nechada kelishim kerakligini so‘radim, lekin ular meni kutishmayotganliklarini aytishdi. Men bu qarorni unchalik tushunmadim, - dedi O‘zil.
Oldinroq klub germaniyalik yarim himoyachidan tashqari O‘zan Tufanni ham tarkibdan chetlatgani ma’lum bo‘lgandi. Keyinroq esa klub bu futbolchilar bilan rasman xayrlashgani haqida xabar tarqatdi.
Qo‘shimcha qilamizki, Mesut O‘zil 2021 yilning yanvaridan beri «Fenerbaxche»da o‘ynab kelayotgandi. Joriy mavsumda 33 yoshli germaniyalik futbolchi barcha turnirlar doirasida 26 ta o‘yinda maydonga tushib, 9 ta gol va 2 ta golli uzatmaga mualliflik qilgan.
