Туркиянинг «Фенербахче» клуби ярим ҳимоячиси Месут Ўзил асосий жамоадан четлатилганини тасдиқлади.

“Дам олиш кунлари Германияга бордим. Туркияга қайтаётганимда клубга қўнғироқ қилиб машғулот учун соат нечада келишим кераклигини сўрадим, лекин улар мени кутишмаётганликларини айтишди. Мен бу қарорни унчалик тушунмадим, - деди Ўзил.

Олдинроқ клуб германиялик ярим ҳимоячидан ташқари Ўзан Туфанни ҳам таркибдан четлатгани маълум бўлганди. Кейинроқ эса клуб бу футболчилар билан расман хайрлашгани ҳақида хабар тарқатди.

Қўшимча қиламизки, Месут Ўзил 2021 йилнинг январидан бери «Фенербахче»да ўйнаб келаётганди. Жорий мавсумда 33 ёшли германиялик футболчи барча турнирлар доирасида 26 та ўйинда майдонга тушиб, 9 та гол ва 2 та голли узатмага муаллифлик қилган.