Ular shunchaki butsasini devorga ilgisi kelmadi. Shunday futbolchilar borki, ular futboldan ketib, yana qaytgan. Qaytganda ham o‘zini yulduzga aylantirgan jamoasiga qaytadi. Bugun ana shunday nomlar haqida gap boradi.
Petr Chex
«Chelsi» afsonasi 2019 yilda «Arsenal» safida so‘nggi bor ko‘rinish bergandi. U «Emireyts» stadionidagi to‘rt yillik xizmatidan keyin, futboldan ketganini e’lon qiladi. Chex «Chelsi» bilan 11 yil davomida birga bo‘ldi va 4 marta mamlakat chempioniga aylandi. U jonajon klubiga qaytib, texnik maslahatchi rolini bajara boshladi. 39 yoshli Chex, 2020 yilda «Chelsi» safiga zaxiradagi darvozabon sifatida kiritilgan edi.
Pol Skoulz
«Old Trafford»ni tark etganidan olti oy o‘tib, Skoulz yana «qizil iblislar» safiga qaytadi. Fergyuson undan jamoaning yarim himoyasida katta muammolar borligida foydalana boshlaydi. O‘sha paytlarda Fil Jons hamda Fabio Silvalar jufligi markazni egallar edi. Skoulz esa har ikkisidan birining yo‘qligini sezdirmaslik uchun foydalaniladi. Futbolchi 2011-2012 yilgi mavsumda jami 21 ta o‘yin o‘tkazadi. O‘sha yili «MYU» ikkinchi o‘rinni egallagan edi. Pol Skoulz keyingi mavsumda yana bir bor APL chempioni bo‘lishga erishgan. Keyin esa bemalol «nafaqa»ga chiqib ketadi.
Yoxan Kroyf
Niderland futbolchisi futbolga o‘ta kuchli muhtojlikdan qaytishga majbur bo‘lgan. 31 yoshli Kroyf o‘sha paytda futbolga qaytishi haqida shunday yozgandi: «Men cho‘chqa fermasiga pul tikib, millionlarni yo‘qotdim. Bu esa meni futbolga qaytishga majbur qildi». U o‘z nafaqasidan ko‘p o‘tmay, 1978 yilda yana futbolga qaytib, «Los Anjels Asteks» klubida o‘ynay boshlaydi. Hujumchi keyinchalik o‘z yurtiga qaytib, «Ayaks» hamda «Feyenoord» safida muvaffaqiyat qozondi. U 1984 yildagina futboldan butunlay ketgan.
Aryen Robben
Yana bir «uchar gollandlar»dan biri, «Chelsi»ning sobiq yulduzi Robbendir. U ham qaytish qilgan futbolchilardan. Ammo uning sababi insonga ko‘proq ta’sir qiladi. Robben 2020 yilda o‘zini tarbiyalagan klub bo‘lmish «Groningen» bilan bitim tuzgan. 37 yoshli futbolchi «Bavariya» safida katta yutuqlarga erishgandi. Ammo uning o‘z yurtidagi ishlari unchalik ham omadli bo‘lmadi. Robben bir mavsum davomida atigi 6 ta o‘yinda qatnashdi. U 2021 yilda qaytadan butsalarini mixga ilishga majbur bo‘ladi.
Yens Lemann
2008 yilda «Arsenal»ni tark etib, futboldan ketganini e’lon qilgan afsonaviy nemis futbolchisi, ikkinchi marta «to‘pchilar»ga yordamga keladi. U bir mavsumga 2011 yilda, Venger jamoasida zaxira darvozaboni vazifasini bajargan. 42 yoshli futbolchi asosiy posbon Almuniya mashg‘ulotlarda jarohat olgach, «Blekpul» bilan o‘yinda ishtirok etadi. O‘shanda «Arsenal» 3-1 hisobida g‘alaba qozonadi. Ammo Lemannga darvozani dahlsiz saqlab qolish nasib etmaydi.
Denilson
Braziliyalik mashhur futbolchi Denilson yaqindagina hammani hayratga solib, 44 yoshida futbolga qaytgandi. Sobiq «MYU» yulduzi bir paytlar jahonning eng qimmat futbolchisiga aylangan. Vinger orada 12 yillik tanaffusdan so‘ng, Braziliyaning pastki divizon jamoasi «Ibis» bilan shartnoma imzoladi. Denilson 1996-2003 yillar davomida 61 marta milliy terma jamoa safida harakat qilgan. U 2002 yilda Jahon chempionatida zafar quchgan edi. Denilson de Oliveyraning 1998 yildagi «San-Paulu»dan «Real Betis»ga 21,5 million funtga transfer qilinishi, uni eng qimmat futbolchiga aylantiradi...
ISMATOV J.
