Kunning eng yaxshi hikoyasi
Ushbu qiyin paytlarda barchamiz ijobiy va umid baxsh etadigan yaxshi hikoyalarga muhtojmiz. Aynan shunday voqea shanba oqshomida Amsterdamdagi "Yoxan Kroyf Arena"da sodir bo‘ldi. U yerda JCH-2022 yo‘llanmasini qo‘lga kiritgan Niderlandiya va Daniya terma jamoalari o‘rtoqlik uchrashuvi o‘tkazdi. Ammo bu holatda natija va ba’zi taktik tafsilotlar ikkinchi darajali.
Asosiy voqea - Kristian Eriksen o‘tgan yilning 12 iyunida bo‘lib o‘tgan dramadan beri birinchi marta yana Daniya terma jamoasi libosida maydonga tushdi. Bu 47-daqiqada Yesper Lindstremni almashtirganda sodir bo‘ldi. Bir daqiqadan so‘ng Eriksen gol urdi - bu uning futbolga qaytganidan keyingi birinchi goli.
Bu Amsterdamda, daniyalik o‘smirlik chog‘ida kelgan va to‘rt yil davomida o‘zining Yevropadagi buyuk karerasini boshlagan klub - "Ayaks"ning uy stadionida sodir bo‘lgani ramziy ma’noga ega. Aynan Amsterdam yoshlar jamoasi bilan Eriksen bir muddat mashg‘ulot o‘tkazdi va futbolga qaytishga tayyorlandi.
Va bularning barchasi Yevro-2020da sodir bo‘lgan dahshatli voqeadan to‘qqiz oy o‘tgach. Finlyandiyaga qarshi o‘yinning birinchi bo‘limi yakunida Eriksen yurak xurujiga uchradi. U hushini yo‘qotib, maydonga yiqildi. Yaxshiyamki, Daniya jamoasi shifokorlari Kristianning hayotini saqlab qolishga muvaffaq bo‘lishdi. Bir necha kundan so‘ng yarim himoyachiga yurakni nazorat qiluvchi kardioverter-defibrilator qurilmasi o‘rnatildi.
Dekabr oyi o‘rtalarida Eriksen o‘ynagan "Inter" futbolchi bilan shartnomani o‘zaro kelishuv asosida bekor qilganini e’lon qilgandi. Bu qarorga Italiya tibbiyot qonunchiligiga ko‘ra, A seriyada implantasiya qilingan yurak stimulyatori bilan o‘ynash taqiqlangani sabab bo‘ldi.
“Klub Krisni qo‘llab-quvvatlaydi va unga kelajakda eng yaxshi tilaklarni tilaydi. Eng yaxshi lahzalar, gollar va g‘alabalar, Skudetto bayrami paytida muxlislar bilan quchoqlashish – bularning barchasi "Inter" tarixida qoladi, shuningdek, klub va Kristian o‘rtasidagi mustahkam va ajralmas rishta", — deyilgandi "Inter"ning Kristian bilan xayrlashuv xabarida.
Eriksenning o‘zi futbolga qaytish va faoliyatini davom ettirish istagini bildirdi.
"Mening orzum – Daniya terma jamoasiga qaytish va yana "Parken"da o‘ynash. Men barcha muammolar o‘tmishda ekanligini va yana terma jamoada o‘ynashim mumkinligini isbotlamoqchiman", dedi u yanvar oyida Daniyaning DR telekanaliga bergan intervyusida.
Qishki transfer oynasining so‘nggi kunida Eriksen "Brentford" bilan shartnoma imzoladi - Angliyada yurak stimulyatori bilan o‘ynash uchun hech qanday qonuniy to‘siqlar yo‘q edi. Unga jamoaga qo‘shilib ketish uchun biroz vaqt kerak bo‘ldi, shuning uchun u birinchi o‘yinini 26 fevralgacha o‘tkazmadi va "Nyukasl"ga qarshi o‘yinda zaxiradan maydonga tushdi. U "Norvich" va "Byornli" bilan o‘yinlarni to‘liq o‘tkazgan va hatto bitta golli uzatmani amalga oshirgan.
"Men juda baxtli odamman. O‘zim boshdan kechirganlarni boshdan kechirish va qaytish – ajoyib tuyg‘u. Hammasi shu yerda. Menga yordam bergan oilam, ota-onam, farzandlarim va bir qancha shifokorlar. Ularning boshidan kechirganlari men boshdan kechirganimdan ham og‘irroq", - dedi Eriksen "Nyukasl" bilan o‘yindan keyin. Kristian Eriksen shu tariqa hammaga sabr-matonat, futbol o‘ynashga bo‘lgan ishtiyoqini ko‘rsatib qo‘ydi.
Futbolni seving!
