Rimning «Lasio» va Italiya terma jamoasi markaziy himoyachisi Franchesko Acherbi «Inter»ning transfer bozoridagi asosiy maqsadi bo‘lib qoldi.
O‘tgan oyda futbolchining agenti va "Lasio" klubi Acherbining transferi borasida istalgan klubdan kelib tushadigan taklifni ko‘rib chiqish borasida kelishib olgan edi. Eslatib o‘tamiz, 34 yoshli futbolchi mavsum mobaynida klubi muxlislari bilan janjallashib qolgandi.
Tuttomercatoweb portalining tarqatgan ma’lumotiga qaraganda, tajribali himoyachi «Inter» klubiga o‘tishi mumkin. Milanliklar Acherbini Stefano de Vreyga o‘rinbosar sifatida ko‘rmoqda.
Franchesko Acherbi joriy mavsum 28 ta uchrashuvda maydonga tushdi va uchta gol kiritdi. Uning "Lasio" bilan amaldagi shartnomasi 2025 yilning yozigacha amal qiladi.
