Amerika jamoalari hech qachon o‘z formasiga homiylar ramzini tiqishtirib yuborishdan uyalmagan. Ammo Braziliyaning «Kaskavel» klubi bu borada chegaradan o‘tib ketdi. Futzal bo‘yicha mam-lakatning amaldagi chempioni sanalgan ushbu jamoaning yangi mavsum uchun taqdim etgan futbolkasida logotiplar soni shu qadar ko‘pki, ularni bir-biridan ajratish qiyin.

Umuman, «bechora» formada bo‘sh joyning o‘zi yo‘q. Aftidan, «Kaskavel» rahbariyati butun reklama bozori pulini o‘zlashtirishni xohlaydi, chog‘i.

Braziliya klubi rahbarlariga qoyil qolish kerak. Ular homiylarni logotiplar umumiy «manzara»da yo‘qolib qolmasligiga qanday ishontirishgani ajablanarli, albatta. Footy Headlines sayti xodimlari erinmay sanab chiqishdi - libosda 36ta brend logotipi bor. Hattoki, shortining orqa tarafi ham tasvirlarga to‘la.

«Kaskavel»ning uy o‘yinlariga mo‘ljallangan libosi yuqori va pastki qismida qizil hamda ko‘k chiziqlar bor. Sotuvga chiqarilgan liboslarda esa chiziqlar olib tashlangan, homiylar uchun joy bo‘shatish uchun, albatta. Raqam esa pastki burchakda yashiringan. Shortining old va yon tomonlarida kamida 9ta logotip bor. Meinerz firmasi tomonidan ishlab chiqarilgan bu futbolkalar klubning rasmiy sayti orqali 79,9 real (taxminan 1700 rubl)dan sotiladi. Erkaklar va ayollar uchun mo‘ljallangan formalar alohida, ammo homiylar lotiplaridan xolisi yo‘q. Ha, muxlislar bunday formada yurishdan xursand bo‘lmasalar kerak, ammo kolleksionerlar tomonidan qiziqish juda katta.

So‘z

- Meinerz bilan hamkorlikni yo‘lga qo‘­yishda muxlislarni hisobga oldik. Chunonchi, milliy ligadagi g‘alaba ortidan jamoamiz mashhurligi Parana shtati chegarasidan oshib, butun Braziliyaga yoyildi. Shunday ekan, formamizni mamlakat bo‘ylab tarqatish imkoniyatidan xursandmiz. Jefferson Zini («Kaskavel» prezidenti).