Xabaringiz bor, 24-29 mart kunlari Tojikiston poytaxti velosportning shosse yo‘nalishidagi Osiyo chempionatiga mezbonlik qildi. Unda muvaffaqiyatli ishtirok etgan sportchilarimiz bugun poytaxtimizda munosib kutib olindi.

Velosportchilarimizni qutlash boshqa sport turlariga qaraganda o‘zgacha o‘tdi. Mutasaddilar musobaqa qahramonlarini "Bunyodkor" stadionida qarshi olishdi. Marosimda MOQ raisi o‘rinbosari Sherzod Tashmatov, Kozim O‘rinboyxo‘jayev boshchiligidagi O‘zbekiston velosiped sporti federasiyasi vakillari, O‘zbekiston Respublikasi Sportni rivojlantirish hamda Mudofaa vazirligi xodimlari, sportchilarimizning yaqinlari ishtirok etishdi.

Qit’amizning 23 mamlakatidan tashrif buyurgan sportchilar bilan kechgan raqobatda hamyurtlarimiz 5 ta oltin, 1 ta kumush va 2 ta bronza medallarini qo‘lga kiritib, umumjamoa hisobida ikkinchi o‘rinni egallashgan edi. Qayd etish joiz, bu jamoamizning Osiyo chempionatlari tarixidagi eng yaxshi natijasi bo‘ldi.

Marosimda mutasaddilar sportchilarimizni ushbu ulkan muvaffaqiyat bilan qutlab, ularga kelgusi musobaqalarda, jumladan joriy yil Xanchjou shahrida o‘tadigan Osiyo o‘yinlarida ham chempionlik shohsupasiga ko‘tarilishlarini tilashdi.