Futzal bo‘yicha Qirg‘iziston milliy jamoasi bosh murabbiyi Amirjan Mukanov O‘zbekistonga qarshi bo‘lib o‘tgan o‘rtoqlik o‘yinlari borasida o‘z fikrini bildirib o‘tdi. Eslatib o‘tamiz, Toshkentda o‘tkazilgan har ikki bahsda o‘zbekistonliklar 4:2 va 2:1 hisoblarida g‘alaba qozonishdi.

"Birinchi o‘yinni biz sust boshlagan bo‘lsak, raqib o‘zini "mezbonlarcha" tutdi, pressing ishlatdi. Ushbu vaziyatdan, raqib pressingidan chiqib keta olmadik. Faqatgina 8-daqiqaga kelib o‘yinni tenglashtirishga muvaffaq bo‘ldik. Birinchi taym 1:1 hisobi bilan yakunlandi, ammo O‘zbekiston kichik ustunlikka erishdi. Ikkinchi taymda esa Abdildayevning xatosi evaziga ikkinchi golni o‘tkazdik. Biz ko‘p qarshi hujumlar uyushtirdik, tajovuzkor o‘yin namoyish eta boshladik. Uchrashuv qarama-qarshi hujumlar ostida o‘tdi. Ammo raqib o‘z imokniyatlaridan samarali foydalanib, yana 2ta gol urdi. Shunga qaramay, biz bosim o‘tkazishda davom etdik va bitta gol urishga muvaffaq bo‘ldik — 4:2.

Ikkinchi bahsni esa yaxshiroq o‘tkazdik. Ayniqsa, ikkinchi bo‘limda jiddiy ustunlikka erishib, ko‘p vaziyatlar yaratdik. Bu bahsda durangga erishganimizda haqqoniy natija bo‘lardi.

O‘zbekiston terma jamoasi Jahon chempionatida ishtirok etgani ularga kuchli ishtiyoq bergan. Ular jahonning yetakchi jamoalari bilan ko‘p o‘rtoqlik o‘yinlarida ishtirok etishdi: Portugaliya, Argentina, Fransiya. O‘zbek futzalchilari o‘zlariga juda ishonishgan, ularni mag‘lub etish oson emas. Bu — tarkib va o‘yin borasida men ko‘rgan eng yaxshi O‘zbekiston terma jamoasi.

Mazkur o‘yinlar har ikki tomon uchun foydali bo‘ldi. 10 aprel sanasiga eng yaxshi formada yetib kelish uchun ishlashda davom etamiz", — dedi Mukanov.