"Navbahor" ustidan qozonilgan g‘alabadan so‘ng "Sherlar" bosh murabbiyi matbuot anjumanida o‘yin haqida fikrlarini bildirdi.

- Avvalo, futbolchilarimni tabriklayman. O‘yin qiyin o‘tdi. Har tomonlama charchadim. Hayajonli bahs bo‘ldi. Bugungi uchrashuvni nazorat qilib bordik. To‘p nazorati biz tomonda bo‘ldi. Yakunda kiritilgan gol orqali g‘alaba qozondik.

Ixtiyorimizda 12-13 nafar futbolchi bor edi. Sakkiz nafar o‘yinchi terma jamoalar safida bo‘ldi. "Navbahor"ga qarshi o‘yinga to‘liq tarkib bilan tayyorlana olmadik. Bu bizga pand berishi mumkin edi. Qishki yig‘inlarda olib borgan taktik mashg‘ulotlarimiz ish berdi. Biz g‘alabani istagandik va yakunda buni uddalay oldik. Bundan xursandman.

O‘yin oxirida yuz bergan holatlar dilimni hira qildi. Bunday janjallar, mushtlashuvlar professional futbolchilarga xos bo‘lmagan jihat hisoblanadi. G‘alaba qozondingmi, mag‘lub bo‘ldingmi - buni qabul qila olishing kerak.

Bilaman, biz ham hali Namanganga boramiz va u yerga boshni tik tutgan holda borishimiz kerak. Umid qilamanki, bunday vaziyatlarga federasiya ham munosabatini bildiradi. O‘yin ajoyib bo‘ldi, atmosfera ham yuqori edi. Faqat bahs tugagach bunday holatlar qoidalarga to‘g‘ri kelmaydi.

Zaxiradan o‘yinchilarni maydonga tushirish ham reja. Biz g‘alaba qozondik. Demak, bu to‘g‘ri qaror edi. Masalan o‘yin yakunida barcha 5 ta o‘zgarishni amalga oshirishim ham mumkin edi.

"Nasaf" va "Navbahor"ni taqqoslashni to‘g‘ri deb hisoblamayman. "Nasaf"ga qarshi faqatgina bitta o‘yindan iborat bahsda o‘ynadik. Jamoa chempionat o‘yinida boshqacharoq o‘ynagan bo‘lardi. Shuning uchun bu savolga to‘liq javob bera olmayman.