«Manchester Yunayted»ning tajribali portugaliyalik hujumchisi Krishtianu Ronaldu «Everton»ga qarshi bo‘lib o‘tadigan APL doirasidagi o‘yinda jamoasiga yordam bera oladi.
«Qizil iblislar» ustozi Ralf Rangnik jurnalistlarga ma’lum qilishicha, 37 yoshli portugaliyalik futbolchi safga qaytdi va «Everton» bilan o‘yinda mankunianliklarga yordam bera oladi. Eslatib o‘tamiz, Ronaldu kasalligi tufayli «Lester» bilan so‘nggi uchrashuvni o‘tkazib yuborgan edi.
Joriy mavsumda Krishtianu Ronaldu Angliya chempionatida 24 ta o‘yin o‘tkazib, 12 ta gol va 3 ta golli uzatmaga mualliflik qilgan.
