OCHLning guruh bosqichi 2-tur doirasida bo‘lib o‘tgan "At-Ta’avun" - "Paxtakor" jamoalari o‘rtasidagi uchrashuvdan so‘ng toshkentliklar bosh murabbiyi o‘z fikrlari bilan o‘rtoqlashdi.
"Bugun qiyin o‘yin bo‘lishini bilardik. Mezbonlarni o‘z maydonida mag‘lub etish juda yoqimli. Bellashuvga jiddiy tayyorlandik. Yigitlarga yaxshi futbol uchun rahmat aytaman. Tavamba va 77-raqamli futbolchining juda xavfli ekanini bilardik. Himoyachilar ularga qarshi ajoyib o‘ynashdi. Keskin kechadigan bahs taqdirini qisqa hududda tez harakatlanadigan tezkor futbolchilar hal qilishini sezgandik. Shunday bo‘ldi ham. Aliboyev va Erkinov o‘yin sur’atini o‘zgartirib yuborishdi. G‘alabadan juda xursandmiz.
O‘yinimizda sir yo‘q. Shunchaki sharoitlarga yaxshiroq moslashdik va jiddiy hozirlik qildik.
Chap qanotimizni asosiy hujum uyushtiradigan joyimiz deb bilmayman. Har ikki qanotdan va markazdan hujumlar tashkil qilishga urinamiz. Bugun golni chap qanotdan urib ketdik" - dedi Voyneski.
