«Milan» klubi bosh murabbiyi Stefano Pioli A Seriya chempionligi uchun kurash haqida fikr bildirdi.

Italiya chempionatining joriy turida Skudettoga ikki davogar klublar ochko yo‘qotishdi: «Napoli» kutilmaganda o‘z uyida «Fiorentina»ga yutqazdi (2:3), «Milan» esa «Torino» bilan durang o‘ynadi (0:0).

«So‘nggi ikki-uch hafta ichida qaysi jamoa favorit deb atalsa, o‘sha jamoa xato qilishga moyil bo‘ladi. A Seriya juda raqobatbardosh liga, har bir o‘yin o‘ta og‘ir va hech narsani oddiy deb bo‘lmaydi.

Biz shunday vaziyatda bo‘lishni xohlagan edik, shuning uchun bosim ostida o‘zimizni qulay his qilishimiz kerak. Bizda yosh jamoa bor, biz o‘ziga xos narsa uchun kurashyapmiz.

Kim asosiy favorit ekanligi haqida gapirishni yoqtirmayman. Shuni unutmangki, so‘nggi haftalarda odamlar navbatma-navbat bizni, «Napoli»ni va «Inter»ni superfavoritlar deb atashdi. Bu chempionat oxirigacha davom etadi”, - dedi Pioli DAZN bilan suhbatda.