O‘zbekiston Kubogi guruh bosqichi, 2-turidan o‘rin olgan “Navbahor” – “Dinamo” o‘rtasidagi uchrashuv arafasida “lochinlar”ning 28 yoshli serbiyalik hujumchisi Zoran Marushich bo‘lajak o‘yin haqidagi fikrlari bilan o‘rtoqlashdi.

- Jamoamizning oldiga joriy mavsumda Osiyo Chempionlar Ligasi (OCHL) yo‘llanmasini qo‘lga kiritish vazifasi qo‘yilgan. Buni amalga oshirish uchun xoh o‘z maydonimiz, xoh safarda bo‘lsin, barcha o‘yinlarda maydonga g‘alaba ishtiyoqida tushib, bizni munosib tarzda qo‘llab-quvvatlayotgan muxlislarga quvonch ulashishga harakat qilamiz.

Xudoga shukr, O‘zbekiston kubogi bahslarini ham omadli tarzda boshlab, ilk o‘yinda joriy mavsum yetakchilaridan biri bo‘lgan “Qizilqum”ni mag‘lubiyatga uchratishga muvaffaq bo‘ldik va “Dinamo” bilan bo‘ladigan bahsda ham g‘alabali odimimizni davom ettirishga intilamiz.

OCHL yo‘llanmasini qo‘lga kiritish uchun Superliga hamda O‘zbekiston kubogi turnirlarida maksimal natijaga erishish lozim hamda ta’kidlaganimdek, buni amalga oshirish uchun barcha imkoniyatimizni ishga solamiz.

Fursatdan foydalanib, muxlislarga musulmonlar uchun muqaddas bo‘lgan Ramazon oyidagi ibodatlarni bajarishda kuch-quvvat, ushbu ibodatlarni Yaratgan o‘z dargohida qabul qilishini tilab qolaman.

Ishqibozlardan esa bo‘lajak o‘yinda stadionga ko‘proq tashrif buyurib, jamoamizni bevosita qo‘llab-quvvatlab, madad berib turishlarini so‘rayman.

Biz – futbolchilar muxlislarning qo‘llab-quvvatlashlariga yarasha maydonda munosib to‘p tepib, ularga quvonch ulashishga intilamiz hamda g‘alaba qozonish uchun barcha imkoniyatimizni ishga solamiz.

Baxtimizga “Navbahor” ishqibozlari hamisha sog‘ bo‘lishsin" - dedi Zoran Marushich.