Madridning «Real» klubi bosh murabbiyi Karlo Anchelotti faoliyatida 8 marta Chempionlar ligasining yarim finaliga chiqdi. 1/4 finalning javob uchrashuvida «qaymoqranglilar» o‘z maydonida «Chelsi»ga imkoniyatni boy berishdi (qo‘shimcha vaqt 2:3), ammo umumiy hisobda g‘alaba qozonishdi (5:4).
Tvitterdagi B/R Football xabariga ko‘ra, Anchelotti Chempionlar Ligasi yarim finaliga chiqish borasidagi rekord bo‘yicha «Roma»ning amaldagi bosh murabbiyi Joze Mourinyo va «Manchester Siti» bosh murabbiyi Xosep Gvardiolaga tenglashib oldi. Faqat bu 3 nafar murabbiy o‘z faoliyati davomida 8 marta Chempionlar ligasining yarim finaliga qadar etib borgan. Eslatib o‘tamiz, Anchelotti «Real» bilan 3 marta, «Milan» bilan 4 marta, «Yuventus» bilan yana bir marta Chempionlar ligasining 1/2 final bosqichiga chiqqan.
Shu bilan birga, 13 aprel kuni Gvardiola agar «Man Siti» «Atletiko»ni umumiy hisobda mag‘lub etsa (birinchi o‘yin inglizlar foydasiga 1:0 hisobida yakunlangan) bu ko‘rsatkich bo‘yicha yagona peshqadamga aylanishi mumkin.
