Angliyada o‘tgan hafta yakuni 32-tur o‘yinlari bilan yodimizda qoldi. Ushbu davr mobaynida esa bir-biridan ajoyib gollar kiritilganiga guvoh bo‘ldik. Xususan, tur davomida 29 ta gol darvoza to‘ridan joy olgan. Biz esa ular ichidan eng yaxshi va chiroyga egalarini tanlab olishga harakat qildik. Quyida, oltita gollar mualliflari nomlari keltirib o‘tiladi.
1. Enok Mvepu – «Arsenal»ga qarshi
Demak, ro‘yxat boshida «Brayton»ning «Arsenal» maydoniga safari yodga olinadi. Ushbu o‘yin 2-1 hisobida «chag‘alaylar» foydasiga hal bo‘lgandi. «Emirates»dagi o‘yin hisobi Leandro Trossard tomonidan ochiladi. Ha, belgiyalik hujumchining goli ham juda chiroyli yo‘llangan edi. Ammo biz iloji boricha bitta jamoadan bir kishini tanlab olishga harakat qildik. Bahs mobaynida mehmonlar yarim himoyachisi Mvepuning harakatlari alohida ahamiyatga molik bo‘ldi. Uning goli esa to‘xtatmasdan yo‘llangan zarbadan qolishmadi va Remsdeylning imkoniyatlarini yo‘qqa chiqardi. Yakunda esa aynan ushbu gol «Brayton»ga uch ochko taqdim etdi.
2. Meyson Mount – «Sautgempton»ga qarshi
«Sautgempton»ning 6-0 hisobida dog‘da qoldirilishi, katta shov-shuvli voqea emas. Ammo ushbu gollar ichidan faqat bittasini tanlab olish, nisbatan muammoroq jarayon edi. Freyzer Forsterni dog‘da qoldirgan to‘p, Angliya terma jamoasi yarim himoyachisi tomonidan taxminan 20 yardcha masofada turib yo‘llangan edi.
3. Rafinya – «Uotford»ga qarshi
«Lids Yunayted»ning 3-0 hisobida mehmonda qozonilgan g‘alabasi, jamoaga APLda sal bo‘lsada erkinroq nafas olish imkonini taqdim etdi. Negaki, Jessi Marsh shogirdlari turnirni tark etish xavfi ostida qolayotgan jamoalardan biri bo‘lib turgan edi. «Bug‘ular» darvozasiga kiritilgan birinchi gol qolganlaridan ajralib turdi. Deniyel Jeyms tomonidan berilgan qulay uzatma, Braziliya terma jamoasi hujumchisi Rafinya tomonidan darvozaga yo‘llandi. Ben Foster esa zarba oldida allaqachon ojiz edi.
4. Son – «Aston Villa»ga qarshi
Bilasizmi, aslida «Tottenxem» tomonidan yo‘llangan har bir gol o‘ziga yarasha chiroyli va tanlab olishga arzirdi. Ammo yana o‘sha gap, hamma uchun adolatli bo‘lish kerak va bitta o‘yindan faqat bitta gol tanlanishi mumkin. Janubiy koreyalik hujumchi xet-trik qayd etgan o‘yinda, uning birinchi goli eng yaxshisi deb hisoblanadi. O‘yinning uchinchi daqiqasidayoq urilgan o‘ng oyoqdagi gol, Martinesni dog‘da qoldirish uchun yetarli bo‘ldi.
5. Kirnan Dyusberi-Xoll – «Kristal Pelas»ga qarshi
«Tulkilar» maydonida kechgan bahs mezbonlar foydasiga hal bo‘ldi. Unda «Lester» yarim himoyachisi Dyusberi-Xollning xizmatlari juda katta edi. U «King Power»da kim qirol ekanini ko‘rsatib bera oldi. Birinchi taymning so‘nggi daqiqasida kiritilgan gol Patson Dakaning qulay uzatmasidan keyin yuzaga keldi. 2-1 hisobida yakunlangan bahsda, 23 yoshli futbolchining goli ahamiyatga ega edi. Kirnanning kuchliroq sanalgan chap oyog‘idan yo‘llangan zarba Guayta darvozasining yuqori burchagidan joy oladi.
6. Sadio Mane – «Manchester Siti»ga qarshi
Chempionlik uchun kurashga kirgan «Liverpul» hamda «Manchester Siti» bahsi 2-2 hisobida yakun topgan. Shunday bo‘lishi ham kerak edi. Negaki, kuchlar tengligi va adolatli hisob ta’minlandi. Ushbu uchrashuvning eng zo‘r goli esa ikkinchi taymning dastlabki daqiqasida o‘z tug‘ilgan kunini nishonlayotgan Sadio Mane tomonidan kiritilgan. 2-1 hisobida ortda qolayotgan Klopp jamoasi uchun esa ushbu gol suv va havo kabi zaruriyat edi. Qolaversa, «shaharliklar» himoyasida nuqson topish oson ish emas. Ammo Manega raqibning ahamiyati yo‘q...
ISMATOV J.
