Xabaringiz bor, kecha Chempionlar Ligasi chorak final doirasida «Liverpul» o‘z maydonida «Benfika» bilan durang natija qayd etdi va umumiy hisobga ko‘ra yarim final yo‘llanmasini qo‘lga kiritdi.

Mazkur bahsda asosiy tarkib futbolchilari hisoblangan Salah, Mane, Jota, van Deyk singari yulduzlar o‘yinni zaxirada o‘tirgan holda boshlashdi. Kechagi bahsda Yurgen Klopp tejamkor uslubda futbol ko‘rsatishni ma’qul ko‘rganini aytishimiz mumkin. Jamoa birinchi bahsda 3:1 hisobida g‘alaba qozonganidan keyin xotirjam tarzda javob o‘yinini o‘tkazdi. Bu sal qolsa qimmatga tushib qolishi mumkin edi. Chunki, portugaliyaliklar vakili Darvin Nunyes 3-4 gol urishga muvaffaq bo‘ldi. Lekin, shulardan bittasi hisobga olindi.

Mersisaydliklar «Enfild»da ham hisobni 3:1 ko‘rinishiga keltirishganidan keyin juda ham xotirjam o‘ynashdi. Natijada, hisob tenglashdi va so‘nggi daqiqalar «qizillar» ishqibozlari uchun xavotirli o‘tgani haqiqat. Nunyes bir necha bor xavf soldi. Alisson jamoasi joniga oro kirdi deb bemalol aytishimiz mumkin.

Klopp yarim finalda ham nisbatan kuchsiz bo‘lgan «Vilyarreal»ga qarshi bahs olib boradi. Chorak finalga yo‘l olgan 8 jamoa ichida «Benfika» va «Vilyarreal» daraja jihatidan boshqa klublarga qaraganda autsayder sifatida e’tirof etilgandi. Mana shu ikki klub «Liverpul» qarshisidan chiqmoqda. Bu esa Kloppga nisbatan kamroq talofatga uchrab finalga chiqish imkoniyatini berishi mumkin. Unay Emeri jamoasiga hurmat saqlagan holda aytish kerakki, «Bavariya» va «Yuventus» to‘sig‘idan o‘tgan klub «Liverpul»ga ham qiyinchilik yaratadi, lekin finalga mos o‘yin ko‘rsatishi uchun katta mehnat qilishiga to‘g‘ri keladi.

Narigi juftlikda «Real» va "Manchester Siti" jamoalari final yo‘llanmasi uchun bellashishadi. Klopp shogirdlari esa «Vilyarreal»dan bir bosh ustun hisoblanadi. Futbolda sensasiyalar ham bo‘lib turadi. Ammo, tan olish kerak «Liverpul» va «Vilyarreal» jamoalari o‘rtasidagi bahsda favoritni ayta olamiz.

Mersisayd klubi joriy mavsumda "B" guruhida g‘olib chiqdi va nimchorak final o‘yinida umumiy hisobda «Inter»ni mag‘lub etdi. Shu mavsumda Muhammad Salah 8 gol urgan holda YECHLda jamoasi to‘purari bo‘lib turibdi. UYEFA reytingida 3-o‘rinda qayd etilgan «Liverpul» musobaqa tarixida olti marta zafar quchgan va bu safar ham chempionlikni qo‘lga kiritish uchun harakat qilib ko‘radi.

Klopp 2015 yil klubga bosh murabbiy bo‘lganidan beri «Liverpul» 4-3-3 taktikasida muvaffaqiyatli o‘yin ko‘rsatmoqda. Yuqori shiddatli bosim qilish ham oxirgi mavsumlarda ancha yaxshilanganini ko‘rishimiz mumkin.