«Everton» hujumchisi Risharlison «Manchester Yunayted» tomonidan bo‘lgan qiziqish tufayli «irislar» lagerini tark etishga tayyor, deya xabar beradi Football Insider.

Manbaning xabariga ko‘ra, braziliyalik hujumchi o‘z agentiga joriy mavsum yakunida o‘ziga yangi klub topishni topshirgan. Bundan tashqari, futbolchi allaqachon «Everton» rahbariyati bilan muzokaralar olib borgan va unda u o‘z qarorini ma’lum qilgan. Risharlisonga «Manchester Yunayted» jiddiy qiziqish bildirmoqda.

24 yoshli Risharlison joriy mavsumda «Everton» tarkibida 26 o‘yinda 7 ta golva 4 ta golli uzatmani amalga oshirdi. Uning klub bilan shartnomasi 2024 yilning 30 iyuniga qadar mo‘ljallangan. Transfermarkt portali futbolchining narxini 50 million yevroga baholamoqda.

Eslatib o‘tamiz, 2020/2021 yilgi mavsumda Risharlison «Everton» tarkibida 40 ta o‘yin o‘tkazib, 13 ta gol va 3 ta golga assistentlik qilgan. Avvalroq OAVda unga «Barselona» va «Real» hamda Fransiyaning «PSJ» klublari qiziqish bildirayotgani haqida xabarlar tarqalgandi.