«Эвертон» ҳужумчиси Ришарлисон «Манчестер Юнайтед» томонидан бўлган қизиқиш туфайли «ирислар» лагерини тарк этишга тайёр, дея хабар беради Football Insider.

Манбанинг хабарига кўра, бразилиялик ҳужумчи ўз агентига жорий мавсум якунида ўзига янги клуб топишни топширган. Бундан ташқари, футболчи аллақачон «Эвертон» раҳбарияти билан музокаралар олиб борган ва унда у ўз қарорини маълум қилган. Ришарлисонга «Манчестер Юнайтед» жиддий қизиқиш билдирмоқда.

24 ёшли Ришарлисон жорий мавсумда «Эвертон» таркибида 26 ўйинда 7 та голва 4 та голли узатмани амалга оширди. Унинг клуб билан шартномаси 2024 йилнинг 30 июнига қадар мўлжалланган. Трансфермаркт портали футболчининг нархини 50 миллион еврога баҳоламоқда.

Эслатиб ўтамиз, 2020/2021 йилги мавсумда Ришарлисон «Эвертон» таркибида 40 та ўйин ўтказиб, 13 та гол ва 3 та голга ассистентлик қилган. Аввалроқ ОАВда унга «Барселона» ва «Реал» ҳамда Франциянинг «ПСЖ» клублари қизиқиш билдираётгани ҳақида хабарлар тарқалганди.