"Andijon" klubi O‘zbekiston kubogi guruh bosqchi 3-turi doirasidagi "Aral Samali"ga qarshi o‘yinni o‘tkazish uchun Nukusga bormaydigan bo‘ldi. Bu haqida "burgutlar" matbuot xizmati xabar berdi.

"Ma’lumki, O‘zbekiston Kubogi 3-tur doirasidan o‘rin olgan “Aral Samali” – “Andijon” uchrashuvi 20 aprel kuni Nukusda o‘tkazilishi lozim edi", - deyiladi klub bayonotida.

"Jamoamiz rejaga asosan bugun kunning ikkinchi yarmida Toshkentga yo‘lga chiqishi va ertalab tongda samolyot orqali Nukusga jo‘nab ketishi ko‘zda tutilgandi. Lekin oxirgi paytlarda klubda yuz berayotgan moliyaviy muammolar yakunda “Andijon” klubining Nukus safarini amalga oshirishi uchun to‘sqinlik qildi.

Shu sababli “Andijon” jamoasi “Aral Samali” maydonida o‘tkazilishi kerak bo‘lgan uchrashuv uchun bora olmaydi va buning uchun muxlislarimizdan uzr so‘raymiz!", - deya qo‘shimcha qilinadi "Andijon" klubi matbuot xizmati bergan xabarda. 

"Andijon" matbuot xizmati.