Sesar Aspilikueta chorshanba kuni «Arsenal»ga qarshi 4-2 hisobidagi mag‘lubiyatdan keyin o‘z jahlini tiyib tura olmagan edi. U final xushtagidan keyin tribunadagi «Chelsi» muxlislaridan biri bilan dahanaki jangga kirishadi. Ha, mezbonlarga oson tutib bo‘lmas edi. Chunki ular ketma-ket uchinchi bor o‘z uyida mag‘lubiyat alamini totib ko‘rishiga to‘g‘ri keldi. Ammo Aspilikueta o‘z muxlisi bilan janjallashgan yagona futbolchi emas. Quyida shunday holga tushgan ayrim futbolchilarni eslatib o‘tamiz.
Brunu Fernandesh
Mavsum boshrog‘ida Portugaliya terma jamoasi a’zosi o‘z murabbiyi himoyasiga otlangan edi. «MYU» mehmonda 4-1 hisobida mag‘lubiyatga uchragan oqshom, Sulsher o‘z lavozimidan ozod etiladi. O‘yin yakunlangach, «qizil iblislar» muxlislari Sulsherni haqoratli so‘zlar va xushtakbozlik bilan kuzatib qo‘yishadi. Shu paytda Fernandesh muxlislarga ayb Sulsherda emas, balki butun jamoada ekanini uqtirishga harakat qiladi. U bunda o‘ziga xos keskin ishoralardan foydalangan edi.
Granit Jaka
Qaysidir ma’noda Granit Jakaning «Arsenal»dagi faoliyati saqlab qolinadi. Ammo uning o‘zi aytgandek, bir muddat u va jamoa orasiga jiddiy sovuqchilik tushadi. 2019 yili «Kristal Pelas»ga qarshi bahsdan keyin muxlislar bosimiga uchragan Jakaning jamoadan ketishi aniq bo‘lib qolgandek edi. Bu voqeadan keyin Jakadan sardorlik bog‘ichi tortib olinadi. O‘sha paytda klubni Unai Emeri boshqarar edi.
Devid Bekxem
Devid Bekxem 2009 yilda «LA Gelaksi» tarkibidan ketishini e’lon qiladi. Bu esa jamoa muxlislarining g‘azabiga sabab bo‘ladi. Ingliz afsonasi «Milan» safiga yo‘l olgandi. O‘shanda Bekxem Italiya chempionati MLSdan ko‘ra yaxshiroq deya fikr bildirgan. U ichib olgan, mast muxlis bilan to‘qnash kelib, muammolarga ham duch keladi.
Erik Dayer
2020 yilda Angliya kubogi turniri doirasida «Tottenxem» hamda «Norvich» to‘qnash keladi. O‘shanda himoyachi tribunadagi bir muxlis bilan qattiq janjallashib, mushtlashishgacha borgandi. Keyinchalik esa bu voqea Dayerning akasi sabab sodir etilgani oshkor bo‘ladi. Shundan so‘ng, «shporlar» ustozi Joze Mourinyo voqeaga munosabat bildiradi: «Menimcha, Dayer professionalizmga to‘g‘ri kelmaydigan ish qildi. Biroq istalgan inson uning o‘rnida bo‘lganida, shunday qilardi». Dayer keyinchalik bu qilmishi uchun 4 ta o‘yinga maydondan chetlatiladi.
Markus Reshford
Shu yil mart oyida «Manchester Yunayted» YECHLni tark etgan edi. Shunda jamoa muxlislari hamda Reshford orasida tushunmovchilik yuzaga keladi. Futbolchi stadion tashqarisida jahli chiqqan muxlislar bilan to‘qnash kelgan paytda suratga olinadi. Bu kadrlar tezda tarmoqlarda tarqab ketgan edi. Reshford qo‘li bilan nomaqbul harakat qilishda gumon qilinadi. Ammo hujumchining o‘zi bu narsani rad etadi. Keyinchalik, Reshford Twitter'da barchadan kechirim so‘ragan edi.
Jaloliddin ISMATOV tarjimasi
