«Chelsi» yarim himoyachisi Jorjinyo «Yuventus»ning yozdagi asosiy transfer maqsadlaridan biri hisoblanadi, deya xabar beradi Calciomercato.

Manbaning xabariga ko‘ra, Turin klubi vakillari allaqachon futbolchining agenti bilan uchrashgan. «Keksa sinyora» bosh murabbiyi Massimiliano Allegri jamoani yana g‘alabaga olib borish uchun futbolchini jamoaga taklif qilmoqchi. Bunday transferni amalga oshirish uchun «Yuventus» yarim himoyachisi Artur bilan xayrlashishi kerak.

Jorjinyo Italiyada «Verona» va «Napoli»da o‘ynagan. U 2018 yilda Neapol klubidan 57 million yevro evaziga «Chelsi»ga o‘tgandi. Uning «aristokratlar» bilan shartnomasi 2023 yilning yozida tugaydi.

Joriy mavsumda 30 yoshli italiyalik London klubi safida barcha turnirlar doirasida 42 ta o‘yinda maydonga tushib, 9 ta gol va 4 ta golli uzatmani amalga oshirdi. Transfermarkt futbolchini 45 million yevroga baholangan.