Superliga 5-turidan o‘rin olgan "Olimpik" – "Qizilqum" (0:1) uchrashuvidan so‘ng mezbonlar bosh murabbiyi Timur Kapadze fikrlarini bildirdi.

— O‘yin haqida.
— Qiziqarli uchrashuv guvohiga aylandik. Ikki jamoa ham chiroyli o‘yin ko‘rsatdi. Yigitlarimiz astoydil harakat qilishdi. Ko‘p vaziyatlarga ega bo‘ldik. Afsuski, ulardan unumli foydalana olmadik. Oxirgi daqiqalarda penaltidan ham foydalana olmadik va mag‘lubiyatga uchradik. Umuman olganda, g‘alabaga haqli edik.

Ignatiy Nesterov bugun yuqori sport formada ekanligini namoyish qildi. U har doim yaxshi turgan. "Qizilqum" tajribali futbolchilardan iborat tarkibga ega. Futbolchilarimiz yaxshi harakat qildi. Bunday o‘yinlar bizni kuchliroq qiladi.

— Alisher Odilov nisbatan orqaroqda o‘ynamoqda, o‘tgan mavsumda bunday emasdi...
— Yo‘q, orqaroqda emas. U ikkinchi hujumchi bo‘lib o‘ynadi. Bu yerda taktik jihatdan kimdir orqaroqqa o‘tib turishi lozim edi, bu o‘yindan kelib chiqib yuzaga keladi.

— Yil boshidan buyon markaziy himoya chizig‘ida aniq tandem o‘ynamayapti. Bu nima bilan bog‘liq?
— 3 futbolchimiz jarohatlangan, hatto 4 kishi. Muammo bor edi. Ko‘rganingizdek, qolgan bolalar ham yaxshi harakat qilishdi.

— Jamoada penaltini kim tepishi bo‘yicha aniq bir qaror qabul qilinganmi?
— O‘sha yerda bir qarorga kelindi. Po‘latxo‘ja Xoldorxonov o‘ziga ishonib, to‘p oldiga yaqinlashdi. Balki gol urganda, bu o‘zi uchun qandaydir motivasiya bo‘lardi. Boshqa yigitlarimiz ham tepishni xohlashdi. Bu – futbol. Urganda, xursand bo‘lardik. Demak, keyingi safar boshqa o‘yinchi ijro etadi.