«Real» bosh murabbiyi Karlo Anchelotti Yevropa chempionlar ligasi yarim final bosqichida bo‘lib o‘tgan «Manchester Siti»ga qarshi o‘yin (3:4) borasida o‘z fikrini bildirib o‘tdi.

«Dastlabki o‘yin biz uchun eng yaxshi natija bilan yakunlanmadi. To‘rtta gol o‘tkazib yubordik. Himoyada yaxshi o‘yin ko‘rsatmadik.

Mazkur natija to‘qnash taqdirini hal etishi mumkin. "Siti" kuchli jamoa ekanini bugun namoyish etdi, ammo biz ham ularga qarshi raqobat ko‘rsata oldik. Eng yaxshi himoya finalga chiqishda hal qiluvchi omil bo‘ladi.

To‘rt himoyachi bilan mudofaaning barchasi pozisiyasini yopib bo‘lmaydi. Bunda yarim himoyachilar yordamga kelishi kerak. Biz yakkakurashlarda yutqazdik. Diqqatliroq bo‘lishimiz kerak edi.

Bizda vaziyatlar bo‘ldi, ammo to‘psiz qiynalib qoldik. O‘zimizga bo‘lgan ishonchni saqlab qolishimiz kerak.

Benzema tepgan penaltiga to‘xtaladigan bo‘lsam, bizda boshqa o‘yinchi tepishi mumkinligi haqida fikr bo‘lmagan. Biz Karimga ishonamiz. Bu safar u vaziyatga o‘zgacha yondoshdi. Undan o‘ng burchakka zarbalar kutishadi, u esa markaz bo‘ylab zarba berdi. Barchasi joyida. «Santyago Bernabeu»da bo‘ladigan javob o‘yinida mo‘’jiza kutamiz.

«Manchester Siti» juda yaxshi o‘ynaydi. Salbiy tomoni — biz 4ta gol o‘tkazib yubordik, ijobiy tomoni esa — 3ta gol urdik», – dedi «Madrid» ustozi.