“So‘g‘diyona” va “Metallurg” jamoalari bugungacha kuchlilar safida o‘zaro 40 ta o‘yin o‘tkazgan. O‘zaro o‘yinlarda kichik ustunlik jizzaxliklar tomonida. Ular bunga o‘tgan yilgi har ikkala o‘yinda g‘alaba qozonishgach erishishdi: 17 ta uchrashuvda jizzaxliklar, 15 tasida bekobodliklar zafar quchgan. 7 ta uchrashuvda esa durang natija qayd etilgan. Kiritilgan va o‘tkazib yuborilgan to‘plar farqi – 55:51, “So‘g‘diyona” foydasiga.
Mazkur jamoalar o‘rtasida qayd etilgan eng yirik hisob – 4:0. “So‘g‘diyona” 2001 yildi o‘z maydonida ham, safarda ham bir martadan shunday hisobda zafar quchgan. Eng gollarga boy o‘yin 2014 yili Zominda bo‘lgan uchrashuvda kuzatilgan. Unda darvozalarga to‘qqizta to‘p kiritilgan – 5:4.
Jizzaxda o‘tgan so‘nggi beshta uchrashuv natijasi yuqoridagi suratda aks etgan.
“So‘g‘diyona” haqida
“So‘g‘diyona” futbol klubiga 1970 yilda asos solingan. Dastlabki yillarda DSK (Ko‘ngilli sport klubi) nomi bilan yuritilgan. 1973-75 yillarda – “Mehnat”, 1975 yilda – “Jizzax”, 1976-77 yillarda – “Irrigator”, 1978-81 yillarda – “Bo‘ston”, 1982-85 yillarda – “Zvezda”, 1986-89 yillarda – “Yoshlik” nomlari ostida musobaqalarda qatnashib kelgan. 1990 yildan “So‘g‘diyona” nomini olgan jamoa milliy chempionatlarimizda turli darajada ishtirok etib kelayapti. Birinchi mavsumda vise-chempionlikka erishgan jizaxliklar keyinchalik ikki marta to‘rtinchi o‘rindan joy olishdi. To‘rt marta jamoa kuchlilar safini tark etib, har safar bir yillik tanaffusdan keyin oliy ligaga qaytgan. Jamoaning bitta mavsumda eng ko‘p gol kiritgan o‘yinchisi Aleksey Jdanov, 1998 yilgi chempionatda raqiblari darvozasini 18 marta ishg‘ol etgan.
“So‘g‘diyona” kuchlilar safida bugungacha 775 ta uchrashuv o‘tkazgan: 268 ta g‘alaba, 147 ta durang, 360 ta mag‘lubiyat. Kiritilgan va o‘tkazib yuborilgan gollar nisbati: 976:1235. Jamoaning milliy chempionatlarimizdagi eng yirik g‘alabasi – 10:0 (1992 yil, “Surxon”). Eng yirik mag‘lubiyati esa – 1:8 (2000 yil, “Do‘stlik”), 0:7 (1996 yil – “Navbahor”, 2009 yil – “Neftchi”, 2015 yil – “Lokomotiv”).
