O‘zbekiston Superligasining 6-turidan o‘rin olgan “Qizilqum” – “Navbahor” (1:2) uchrashuvidan keyingi  matbuot anjumanining birinchi qismida namanganliklar ustozi Samvel Babayan OAV xodimlarining savollariga javob berdi. Samvel Vyacheslavovich o‘z so‘zini o‘yin haqidagi fikri bilan boshladi.

— So‘zim avvalida barcha hamyurtlarimizni kirib kelayotgan Ramazon hayiti bilan tabriklab, ularga uzoq umr, sihat-salomatlik tilayman.

Uchrashuv to‘g‘risida to‘xtaladigan bo‘lsak, “Navbahor”ning barcha o‘yinlari qiziqarli va kurashlarga boy tarzda kechmoqda. O‘ylaymanki, bugungi bahs so‘nggi daqiqalargacha barchani hayajonda ushlab turdi. Garchi penalti va chetlatish tufayli, ustunlik jamoamiz tarafida bo‘lsada, ancha vaziyatlarni ko‘kka sovurdik. O‘z maydonimizda  “So‘g‘diyona”dan uchralgan alamli mag‘lubiyatdan keyin bugun g‘alaba qozonishimiz shart edi hamda buni uddalaganimizdan xursandman.

Futbolda bitta raqibni ikki marta yutish qiyin. Buni qarangki, O‘zbekiston kubogi guruh bosqichidagi o‘yindan keyin Superligada ham chempionat yetakchi bo‘lgan “Qizilqum”ni mag‘lubiyatga uchratishga muvaffaq bo‘ldik.

Yigitlarga o‘yin uchun rahmat aytaman. Bugungi g‘alabani Namangan viloyati hokimi Shavkat Shokirjonovich Abdurazzoqovga bag‘ishlaymiz. Shavkat  Shokirjanovich jamoamiz uchun barcha sharoitlarni yaratib bermoqda hamda futbolning haqiqiy jonkuyari. U “Navbahor”ning shonli tarixini qaytarish uchun harakat qilmoqda.

— Elguja Grigalashvili va Nurillo To‘xtasinov bugungi o‘yinda asosiy tarkibda maydonga tushmadi. Buning sababi nimada?
— O‘yin uchun tanlangan taktikadan kelib chiqib shunday qilindi. Kichik rotasiyaga qo‘l urgandik. Shunday bo‘lsa-da, keyinroq ularni maydonga tushirdik va ushub futbolchilar ishonchni oqlashdi.  

— Ikkinchi bo‘limda “Navbahor”ning maydonda bir kishi ko‘p bo‘lib to‘p tepgani sezilmadi...
— Bu psixologiyaga bog‘liq holat. Jizzaxliklar bilan kechgan o‘yinda bizdan har taraflama omad yuz o‘girib, mag‘lub bo‘lgandik. Boshqa tarafdan aytsak, to‘pni nazorat qilib, gol urishimiz lozim edi.

— O‘zbekiston kubogidagi va bugungi “Qizilqum” o‘rtasida farq sezdingizmi?
— Yo‘q sezmadim. O‘shanda ham navoiyliklar jamoamizga jiddiy qarshilik ko‘rsatishgandi, bugun ham munosib raqiblik qilishdi. “Qizilqum” yuqori saviyali o‘yinchilardan tuzilgan jamoa. Bejizga navoiyliklar chempionatda yetakchilik qilishmayapti.

— “Navbahor”  may oyida tig‘iz taqvimga ega bo‘ladi. Jamoa bunga qanchalik tayyor?
— Jamoada futbolchilar yetarli, rotasiyaga qo‘l uramiz. Chempionatda ketma-ket o‘yinlar bo‘lishiga sabab, oraliq “pauza”lar ko‘p. Albatta, maksimal kuchimizni sarflab, ijobiy natijani qo‘lga kiritishga harakat qilamiz.

“Navbahor” PFK matbuot xizmati.