Superliganing 7-turidan o‘rin olgan «Navbahor» - «Bunyodkor» (2:1) uchrashuvidan so‘ng mehmonlar ustozi Shuhrat Maqsudov o‘z fikrlari bilan o‘rtoqlashdi.
Namanganda o‘yin doim shunday keskin ruhda o‘tgan. Muxlislarning qo‘llab-quvvatlashi jamoaning asosiy yutuqlaridan biri deyish mumkin. Bugun ham 27 mingga yaqin ishqiboz tashrif buyurdi. To‘g‘ri yutqazdik, ammo o‘yin durangga mos edi. Uchrashuvdan so‘ng futbolchilarimga rahmat aytdim. Bugun yosh o‘yinchilarimiz xatoga yo‘l qo‘ydi. Lekin shu orqali ular o‘sishga erishadi. Ertangi kunga yaxshi tajriba olishmoqda.
Akademiyamiz Markaziy Osiyodagi eng yaxshisi. Tarbiyalanuvchilarimizni biz o‘ynatmasak ular yo‘qolib ketadi. Men ham tayyor futbolchi olib natija ko‘rsatishni istardim. Lekin biz boshqa yo‘lni tanladik va homiyimiz bildirgan ishonchni oqlayapmiz. Aniq bilamanki, biz to‘g‘ri yo‘nalishdamiz. Futbolda g‘alaba va mag‘lubiyat yonma-yon yuradi. Buni to‘g‘ri tushunishimiz kerak. Bolalarning kelajagi bor. Faqat sabr, vaqt va ishonch kerak.
