Ispaniya La ligasining joriy mavsumdagi chempioni avvalgi turda ma’lum bo‘lgandi — «Real Madrid». Bundan tashqari, ushbu turda Yevropa chempionlar ligasida ishtirok etadigan boshqa 3ta jamoaning ham nomi aniq bo‘ldi. Bular — «Barselona», «Sevilya» va «Atletiko».

Go‘yoki mavsumdagi barcha masala hal bo‘lgandek. Ammo yana bir masala bor: «Barselona», «Sevilya» va «Atletiko» klublari La ligani 2-o‘rinda yakunlashga harakat qilishadi. Buning uchun jiddiy sabab bor. Qanday sabab deysizmi? Bu — Ispaniya superkubogi yo‘llanmasi!

Xabaringiz bor, Superkubok sovrni uchun Ispaniyada 4ta jamoa kurash olib boradi. "Real" chempion sifatida ushbu musobaqada ishtirok etishi aniq bo‘lgan. Bundan tashqari, Ispaniya kubogi g‘olibi — "Betis" ham Superkubok yo‘llanmasiga ega bo‘lgan. Reglamentga ko‘ra, Kubok finaligacha yetib kelgan jamoa ham Ispaniya superkubogida ishtirok etadi. Bu yo‘llanma "Valensiya"ga nasib etdi. Ana endi to‘rtinchi yo‘llanma egasini aniqlash qoldi. Bu yo‘llanma chempionatda 2-o‘rinni egallagan jamoaga nasib etadi.

Ayni paytda ushbu o‘ringa «Barselona», «Sevilya» va «Atletiko» jamoalari da’vogarlik qilishmoqda. Bu borada ustunlik "ko‘k-anorranglilar" tomonida. "Barsa" hisobida 69, "Sevilya"da 65 va "Atletiko"da 64 ochko mavjud. Xavi jamoasi qolgan 3ta turda 4 ochko jamg‘arsa ham La ligada 2-o‘rinni egallab, Ispaniya superkubogi-2023da ishtirok etish huquqini qo‘lga kiritadi.