Испания Ла лигасининг жорий мавсумдаги чемпиони аввалги турда маълум бўлганди — «Реал Мадрид». Бундан ташқари, ушбу турда Европа чемпионлар лигасида иштирок этадиган бошқа 3та жамоанинг ҳам номи аниқ бўлди. Булар — «Барселона», «Севилья» ва «Атлетико».

Гўёки мавсумдаги барча масала ҳал бўлгандек. Аммо яна бир масала бор: «Барселона», «Севилья» ва «Атлетико» клублари Ла лигани 2-ўринда якунлашга ҳаракат қилишади. Бунинг учун жиддий сабаб бор. Қандай сабаб дейсизми? Бу — Испания суперкубоги йўлланмаси!

Хабарингиз бор, Суперкубок соврни учун Испанияда 4та жамоа кураш олиб боради. "Реал" чемпион сифатида ушбу мусобақада иштирок этиши аниқ бўлган. Бундан ташқари, Испания кубоги ғолиби — "Бетис" ҳам Суперкубок йўлланмасига эга бўлган. Регламентга кўра, Кубок финалигача етиб келган жамоа ҳам Испания суперкубогида иштирок этади. Бу йўлланма "Валенсия"га насиб этди. Ана энди тўртинчи йўлланма эгасини аниқлаш қолди. Бу йўлланма чемпионатда 2-ўринни эгаллаган жамоага насиб этади.

Айни пайтда ушбу ўринга «Барселона», «Севилья» ва «Атлетико» жамоалари даъвогарлик қилишмоқда. Бу борада устунлик "кўк-анорранглилар" томонида. "Барса" ҳисобида 69, "Севилья"да 65 ва "Атлетико"да 64 очко мавжуд. Хави жамоаси қолган 3та турда 4 очко жамғарса ҳам Ла лигада 2-ўринни эгаллаб, Испания суперкубоги-2023да иштирок этиш ҳуқуқини қўлга киритади.