Kecha, 10 may kuni 2022 yilning eng shov-shuvli transferlaridan biri amalga oshdi. Erling Xoland rasman "Manchester Siti" futbolchisi. "Shaharliklar"ning norvegiyalik hujumchi transferi uchun to‘lagan miqdori 75 million yevroni tashkil etadi. Hozirgi davrda biz 100 million yevrolik transferlarga o‘rganib qolgan vaqtimiz, bu summa kamdek ko‘rinishi mumkin. Yana kimlar mana shunday narxga sotib olinganini eslab ko‘ramiz.
Romelu Lukaku — "MYU"dan "Inter"ga
2019/20 yilgi mavsumda Milan klubi belgiyalik hujumchini katta mablag‘ sarflagan holda "Manchester Yunayted"dan sotib oldi. Bu darhol o‘z samarasini berdi: Romelu o‘sha mavsum jamoa yetakchisiga aylandi va "Inter"ga Skudettoni qo‘lga kiritishga katta yordam berdi. 2021 yil yozida Lukaku ancha katta narx 115 million evaziga "Chelsi" futbolchisiga aylangandi.
Anxel Di Mariya - "Real"dan "MYU"ga
"Qirollik klubi" safidagi yorqin o‘yinlaridan so‘ng 2014 yilda 75 million yevroga sotib olingan Anxel afsuski "Manchester Yunayted" tarixidagi eng yomon transferlardan biriga aylandi. Bir mankunianliklar qarashda super yulduz bilan shartnoma imzolagandek tuyulgandi, ammo oxir-oqibat Di Mariyaning o‘yin uslubi umuman jamoaga mos kelmadi. Angliyadagi 1 yillik faoliyatidan so‘ng argentinalik vinger 2015 yilning yozida 63 million evaziga "PSJ"ga ko‘chib o‘tgan.
Xames Rodriges - "Monako"dan "Real"ga
2014 yilgi jahon chempionatida o‘zining super harakatlari va to‘purarlik mahoratini namoyish etgan Xames Rodriges uchun "Real" "Monako" hisobiga naq 75 million yevro o‘tkazib bergan. Madridliklar safida umumiy hisobda 125 ta o‘yinda maydonga tushgan kolumbiyalik iqtidor egasi o‘z hisobiga 37 ta gol va 42 ta assist yozdirib qo‘ygan. Ushbu transferni to‘liq omadli deb bo‘lmasa ham, uni yomon transferlar ro‘yxatiga qo‘sha olmaymiz. Hozirda Rodriges o‘z faoliyatini Qatar yulduzlar ligasida "Ar-Rayyan" safida davom ettirmoqda.
Kevin De Bryuyne — "Volfsburg"dan "Manchester Siti"ga
Ehtimol, "Manchester Siti" tarixidagi eng yaxshi xaridlardan biri 2015 yilning yozida amalga oshgan. "Shaharliklar" o‘shanda "Volfsburg" safida porlayotgan Kevin uchun 76 million yevroni nemis klubi hisob raqamiga o‘tkazib berishgan. Ko‘rinib turibdiki, bu kelishuv hozirgi kunda o‘zining har bir yevrosigacha oqlab bo‘ldi. De Bryuyne ayni vaqtda "Man Siti"ning tom ma’noda yetakchisiga aylanib ulgurgan.
Artur - "Barselona"dan "Yuventus"ga
2020 yilning yozida "Barselona" va "Yuventus" o‘rtasida "Artur -> Pyanich" almashinuvi amalga oshganidan xabaringiz bor. O‘shanda Turin klubi braziliyalik yarim himoyachi uchun 76 million yevro sarflagan. Ammo hozirgi kunda Artur ko‘rsatayotgan o‘yin unga sarflagan mablag‘ning yarimini ham oqlamaydi.
