Venesuelalik darvozabon Kristofer Varela Janubiy Amerika klub futbolining bosh turniri - Libertadores kubogi tarixiga alohida muhr bosishga juda yaqin keldi, ammo...

Uni bunday baxtdan o‘z jamoasi hujumchisining bitta ortiqcha harakati mosuvo qildi. Quyidagi materialda shu voqea tafsilotlariga alohida to‘xtalishdi.

Venesuelaning 9 karra chempioni - «Deportivo Tachira» Boliviyada «Independyente Petrolero» mehmoni bo‘ldi. Birinchi bo‘lim vaqti tugayotgan pallada jamoa golkiperi Kristofer Varela o‘z hududidan to‘pni maydonning ikkinchi yarmi tomon yo‘naltirdi. Zarba juda kuchli va aniq (!!!) chiqdi. Ya’ni to‘p barcha futbolchilar ustidan ancha balandda uchib, yakunda yerga tushdi va bo‘sh qoldirilgan darvoza tomon yumalay boshladi. «Independyente Petrolero» kiperi shunchaki, oldinga chiqib ketgandi. Biroq 22 yoshli Varelaning «pishib yetilgan» antiqa golini o‘z jamoadoshi, 31 yoshli hujumchi Entoni Uribe «o‘g‘irlab» oldi. U shunchaki, yugurishdan to‘xtamadi va darvoza chizig‘i ustida to‘pga teginib qo‘ydi. Yirtqich instinkti! Xullas, hakam golni Uribe hisobiga yozdi. O‘yindan keyin esa hujumchi muxlislardan bearmon dakki eshitdi. Fanatlar ijtimoiy tarmoqlarda haligacha Uribeni «tuzlashmoqda». 

Varelaga kelsak, ushbu holat unga o‘ta kuchli ta’sir qildi, shekilli. Har holda, toza goldan mahrum bo‘lgan darvozabon keyingi daqiqadayoq javob to‘pini o‘tkazib yubordi. Xullas, jamoalar tanaffusga teng hisob bilan chiqib ketdi, lekin «Deportivo» ikkinchi 45 daqiqalikda g‘alabani o‘z tomoniga og‘dirdi, baribir. Venesuela jamoasi Libertadores kubogi guruh bosqichi 3-turidan so‘ng 2-o‘rinda (4 ochko) bormoqda, «Independyente» autsayder (1 ochko). Kvartetda esa Libertadores kubogining oxirgi ikki mavsumi g‘olibi «Palmeyras» (Braziliya) oldinda.

FAKT 

«Deportivo Tachiro» klubi tarixida gol quvonchini tuygan yagona darvozabon - bu urugvaylik Daniel Frankovig. Kristofer Varela ikkinchi bo‘lishi mumkin edi, biroq...