“Sho‘rtan” – “Andijon” (0:1) uchrashuvidan keyin o‘tkazilgan matbuot anjumanining ikkinchi qismida mezbonlar murabbiyi Botir Qodirqulov qatnashdi.

— O‘yin haqida fikrlaringiz qanday?
— Uchrashuv og‘ir bo‘lishini bilardik, shunga yarasha tayyorgarlik ko‘rdik. “Andijon”ning o‘yinini o‘rganib chiqdik. Bo‘ydor futbolchilari bor va ikkinchi qavatda yaxshi o‘ynashini bilardik. Oxirida kuchimiz yetmay qoldi, balki muvozanatni yo‘qotgandirmiz.

— O‘yinda qilingan o‘zgarishlar o‘z ta’sirini o‘tkazdimi?
— Bugun yutqazadigan o‘yin o‘ynamadik. Uchrashuv oxirlarida maydonga tushgan futbolchilar unchalik yordam berishmadi. Zaxiradan maydonga tushgan 2-3 nafar futbolchining o‘yinidan ko‘nglimiz to‘lmadi. Yana o‘z ustimizda ishlaymiz.

— Toshkentda “Pro” lisenziyasi uchun o‘qiyotgan “Sho‘rtan” jamoasi bosh murabbiyi Asror Aliqulovning yo‘qligi qanchalik bilindi, deb o‘ylaysiz?
— Asror Choriyevich bilan har kuni telefonda gaplashib turdik. Qanday o‘ynashimiz, qanaqa taktikada harakat qilishimizni muhokama qildik. Kerak bo‘lsa, har yarim soatda muloqot qildik, bugun ham gaplashdik. Bosh murabbiyning ko‘rsatmalarini futbolchilarga tushuntirdik. Yigitlar qo‘llaridan kelganicha harakat qilishdi, ammo 100 foiz emas. Afsuski, oxirgi soniyalarda gol o‘tkazdik. “Andijon” ham bizning o‘yinni o‘rganib chiqqan. Uchrashuvdan keyin bosh murabbiyi bilan gaplashdik. “Sho‘rtan”dan cho‘chiganini aytdi. Shuning uchun ular qarshi hujumda o‘ynadi. Bugun biz o‘ylagandek o‘yin bo‘ldi. Biroq uchrashuv tugashiga 20 soniya qolganida gol o‘tkazib yubordik.

— Gol o‘tkazilgan vaziyatda darvozabon, menimcha, to‘pga chiqishda xatoga yo‘l qo‘ydi. O‘yindagi yagona golda darvozabonni ayblash mumkinmi?
— Hammamiz aybdor. To‘g‘ri, to‘p havoda uzatilganida darvozabonni qo‘lida bo‘lishi kerak. Vaziyatni yana ko‘rib chiqamiz.

“Andijon” matbuot xizmati.