Kecha «Liverpul» g‘alaba qozonib, APL chempionligi so‘nggi turga qolgach, «Manchester Siti» - «Aston Villa» uchrashuviga e’tibor oshgani tabiiy.

Ayniqsa, birmingemliklarni «Liverpul» afsonasi Stiven Jerard boshqarishi hikoyaning go‘zal bo‘lishiga sababdek ko‘rinmoqda. O‘z vaqtida liverpulliklar safida to‘p surib, chempionlikka erisha olmagan, eng yaqin kelingan mavsumda esa, kutilmagan xato tufayli jamoasini mag‘lubiyatiga sabab bo‘lgan Jerardning o‘sha qarzini qaytarishi, bugungi «Aston Villa» tarkibida esa, o‘sha «Liverpul» yetakchilaridan biri Filip Koutinyoning ham borligi - ajoyib.

Lekin masalaning boshqa tomoni ham bor ekan. Hozirda futbol eksperti sifatida tanilgan sobiq «Siti» himoyachisi Mayk Richardning TalkSPORT'ga aytishicha, o‘tgan yozda Jek Grilishning «Aston Villa»dan «Manchester Siti»ga transferi shartnomasida alohida band bo‘lib, agar Grilish yangi jamoasi safida chempion bo‘lsa, «Siti» bonus sifatida qo‘shimcha 15 million funt to‘lashi yozilgan ekan. Ya’ni, agar 38-turda «Aston Villa» «Etihad»da yutqazadigan bo‘lsa, qonuniy 15 million funt oladi.

Ana bo‘lmasam!

Qahramon Aslanov.