«Liverpul» bosh murabbiyi Yurgen Klopp «Real»ga qarshi bo‘ladigan Yevropa chempionlar ligasi final bahsi oldidan o‘z fikrlari bilan o‘rtoqlashdi. Eslatib o‘tamiz, ushbu jamoalar 2018 yilgi finalda ham o‘zaro to‘qnash kelishgan va unda madridliklar 3:1 hisobida g‘alaba qozonishgandi.

«Biz «Real» bilan to‘qnash kelib, mag‘lubiyatga uchragandik. Bizdan qanday munosabat kutyapsiz? Qiziq tomoni, biz madridliklar bilan 2018 yilda Kiyevda to‘qnash kelgan bo‘lsak, oradan bir yil o‘tib Madriddagi finalda musobaqa g‘olibiga aylanganmiz. Ha, faqat boshqa stadion edi («Metropolitano»). Yana bir marta «Real»ga qarshi maydonga chiqamiz. Umuman olganda, finalgacha yetib borsak, Madrid qaysidir jihatdan finalga taalluqli bo‘lmoqda.

Albatta, bu safar hammasini to‘g‘ri bajarishni istaymiz, ammo bu eng muhimi emas. Agar biz final bahsiga: «Qasos! O‘ch!» va shu kabi hissiyot bilan chiqsak, o‘yinimiz o‘xshamaydi. Biz bunday qilmaymiz. Biz finalgacha boshqacha yo‘l bilan yetib keldik. Shu bois, o‘z o‘yin uslubimizga sodiq qolishimiz kerak va shunday qilamiz ham», – dedi «Liverpul» ustozi.