«Ливерпуль» бош мураббийи Юрген Клопп «Реал»га қарши бўладиган Европа чемпионлар лигаси финал баҳси олдидан ўз фикрлари билан ўртоқлашди. Эслатиб ўтамиз, ушбу жамоалар 2018 йилги финалда ҳам ўзаро тўқнаш келишган ва унда мадридликлар 3:1 ҳисобида ғалаба қозонишганди.

«Биз «Реал» билан тўқнаш келиб, мағлубиятга учрагандик. Биздан қандай муносабат кутяпсиз? Қизиқ томони, биз мадридликлар билан 2018 йилда Киевда тўқнаш келган бўлсак, орадан бир йил ўтиб Мадриддаги финалда мусобақа ғолибига айланганмиз. Ҳа, фақат бошқа стадион эди («Метрополитано»). Яна бир марта «Реал»га қарши майдонга чиқамиз. Умуман олганда, финалгача етиб борсак, Мадрид қайсидир жиҳатдан финалга тааллуқли бўлмоқда.

Албатта, бу сафар ҳаммасини тўғри бажаришни истаймиз, аммо бу энг муҳими эмас. Агар биз финал баҳсига: «Қасос! Ўч!» ва шу каби ҳиссиёт билан чиқсак, ўйинимиз ўхшамайди. Биз бундай қилмаймиз. Биз финалгача бошқача йўл билан етиб келдик. Шу боис, ўз ўйин услубимизга содиқ қолишимиз керак ва шундай қиламиз ҳам», – деди «Ливерпуль» устози.