O‘FA rahbariyati terma jamoalarning murabbiylari tomonidan amalga oshirilgan ishlar hisoboti va keyingi musobaqaga tayyorgarlik rejalari bilan tanishdi. Yig‘ilish davomida har bir yosh toifasidagi murabbiylar o‘z ishiga zamonaviy, rejali va bugungi kun jahon futbolidagi talablarga mos ravishda yondashishi zarurligi ta’kidlandi. Tayyorgarlik jarayonida zamonaviy texnologiyalardan foydalanish, murabbiylar shtabida esa doimiy ravishda tahlilchilar, seleksionerlar va to‘liq tibbiy tarkib bo‘lishi talab qilindi.

Turli yosh toifasidagi 17 ta terma jamoalarimizning barchasiga yagona futbol falsafasini singdirish, futbol mentalitetidan kelib chiqib asosiy yo‘nalishlarni belgilash masalasi o‘rtaga tashlandi. Bu borada murabbiylar kengashining tajribali vakillari ham o‘z fikrlarini bildirib o‘tishdi.

“O‘tkazilgan uchrashuvlar, bo‘lajak raqiblar, har bir futbolchining xatti-harakatlari sinchkovlik bilan o‘rganib chiqilishi va tahlil etilishi zarur. Dunyo futboli bilan hamnafas bo‘lish, tahliliy va tanqidiy yondashib, o‘z ustida ishlagan holda natijalarni yaxshilab borish har bir murabbiyning vazifasi”, — dedi Ravshan Ermatov.

Yig‘ilishda, shuningdek, bolalar-o‘smirlar va ayollar futbolini rivojlantirish, seleksiya jarayonini yanada kuchaytirish, turnirlarga futbolchilarni nafaqat jismonan, balki kuchli texnik-taktik tayyorlab borish masalalari ham muhokama etildi.

O‘zbekiston U-16 terma jamoasining CAFA turniridagi ishtiroki ijobiy baholandi. O‘z navbatida, o‘smirlar terma jamoalariga o‘yinchilar yetishtirib berishda alohida tizim yo‘lga qo‘yish, bu borada akademiyalarning faoliyatidagi uzviy zanjirni mustahkamlash, murabbiylarni xorijda malaka oshirishlarini tashkil yuzasidan takliflar bildirildi.

Mutaxassislar tomonidan oldinda turgan musobaqalarga tizimli tayyorgarlik ko‘rish rejasi ishlab chiqilib, barcha yosh toifasidagi jamoalar uchun tatbiq etish vazifasi qo‘yildi.