Yozda 10 dan ortiq futbolchi "Barselona"ni tark etishi mumkin.
ESPN o‘z manbalariga tayanib xabar berishicha, Kataloniya klubi rahbariyati 10 nafardan ortiq futbolchi uchun yangi jamoa izlashni taklif qiladi.
Xavi jamoada qayta qurishni rejalashtirmoqda, biroq manbalarning ta’kidlashicha, ba’zi o‘yinchilar ketishni istamasliklari, shuningdek, "Barsa"da oladigan yuqori maoshlari tufayli ularni sotish qiyin bo‘ladi.
Xavi Riki Puch, Oskar Mingesa, Martin Breytueyt va Samuel Umtitiga rejalarida yo‘qligini ma’lum qildi.
Kleman Langle, Ferran Yutgla, shuningdek, ijaradan qaytgan Miralem Pyanich va Fransisko Trinkaudan ham ketish so‘raladi.
"Barsa" bu mavsumda jamoada ijarada o‘ynagan Adama Traore va Lyuk de Yongni sotib olmaydi.
Qanot hujumchisi Usmon Dembele va himoyachi Dani Alveshning kelajagi atrofida noaniqliklar mavjud. Ularning shartnomalari 30 iyunga qadar amal qiladi.
Manbalarning qo‘shimcha qilishicha, og‘ir moliyaviy ahvol tufayli "Barsa" Memfis Depay va Frenki de Yong uchun katta takliflarni tinglashga tayyor.
