Ёзда 10 дан ортиқ футболчи "Барселона"ни тарк этиши мумкин.
ESPN ўз манбаларига таяниб хабар беришича, Каталония клуби раҳбарияти 10 нафардан ортиқ футболчи учун янги жамоа излашни таклиф қилади.
Хави жамоада қайта қуришни режалаштирмоқда, бироқ манбаларнинг таъкидлашича, баъзи ўйинчилар кетишни истамасликлари, шунингдек, "Барса"да оладиган юқори маошлари туфайли уларни сотиш қийин бўлади.
Хави Рики Пуч, Оскар Мингеса, Мартин Брэйтуэйт ва Самуэл Умтитига режаларида йўқлигини маълум қилди.
Клеман Лангле, Ферран Ютгла, шунингдек, ижарадан қайтган Миралем Пьянич ва Франсиско Тринкаудан ҳам кетиш сўралади.
"Барса" бу мавсумда жамоада ижарада ўйнаган Адама Траоре ва Люк де Йонгни сотиб олмайди.
Қанот ҳужумчиси Усмон Дембеле ва ҳимоячи Дани Алвешнинг келажаги атрофида ноаниқликлар мавжуд. Уларнинг шартномалари 30 июнга қадар амал қилади.
Манбаларнинг қўшимча қилишича, оғир молиявий аҳвол туфайли "Барса" Мемфис Депай ва Френки де Йонг учун катта таклифларни тинглашга тайёр.
