Bugungi kunga kelib zamonaviy futbolda sport texnologiyalarining o‘rni tobora muhim bo‘lib bormoqda. Mashg‘ulotlar davomida har bir futbolchilarning jismoniy holatini monitoring qilish, ularga yuklamalar berish va tiklanish jarayonini to‘la nazorat qilib borishda maxsus sport texnikalari murabbiylarga ko‘makchi hisoblanadi. O‘zbekiston futbol assosiasiyasi ham barcha terma jamoalarning yig‘inlarini tashkil etishda sport texnologiyalarini qo‘llash bo‘yicha tizimli ishlar olib bormoqda.
Bugun O‘FAda “Catapult” dasturi vakillari bilan uchrashuv bo‘lib o‘tdi. Mazkur dastur sportchilar harakatini innovasion texnologiyalar orqali tahlil qilib borishga mo‘ljallangan bo‘lib, undan dunyoning eng yirik sport jamoalari va tashkilotlari keng foydalanadi. Xususan, kompaniya 39 ta sport turi bo‘yicha 2970 dan ortiq jamoalar bilan ishlab keladi.
Dastur o‘zining mikrotexnologiyalari orqali sportchilarni mashg‘ulot va o‘yinlar paytida nazorat qiladi. U tibbiy va jismoniy ko‘rsatkichlarni tahlil qilib, ilmiy xulosalarni taqdim etish xususiyatiga ega. Mutaxassislar ushbu sport texnologiyasi yordamida nafaqat mashg‘ulotlar, balki yuklamalar va tiklanish jarayonini ham to‘liq nazorat qilishi va boshqarishi mumkin bo‘ladi.
Uchrashuv davomida dastur vakillari mazkur tizimni joriy etish imkoniyatlari xususida ma’lumotlar berishdi. O‘z o‘rnida o‘zbekistonlik mutaxassislar ham ushbu texnologiya xususida fikr va mulohazalarini bildirib o‘tishdi. O‘FA rahbariyati kompaniya vakillari bilan ushbu innovasion sport texnologiyasini barcha terma jamoalar uchun tatbiq etishga tayyorligini ma’lum qildi.