Albatta yanglish mulohazalar bo‘lishi mumkin, lekin baribir yozgim keldi.

Asrimizga kelib klublar o‘rtasidagi musobaqalar qiymati ortib ketganini ko‘pchilik e’tirof etadi. Milliy ligalar, Yevropadagi xalqaro turnirlarning qadri ortishi bilan futbolchilar ham aynan klublarga ko‘proq e’tiborlarini qarata boshlashdi. Yillik futbol taqvimi klublar hisobiga ancha zichlashib ketgan bugun. Ya’ni, milliy jamoada o‘ynaydigan futbolchilar uchun ustuvorlik klubi tomoniga o‘tib bo‘lgandek, menimcha.

Tezlashib ketgan futbolda turli top klublardan, turli top uslublardan kelayotgan futbolchilarni faqat FIFA kunlarining o‘zida tizimga solish, kuchli jihatlar atrofiga o‘yin qurishni uddalash o‘ta murakkab vazifa bo‘lib qolyapti. Shuning uchun milliy federasiyalar bosh jamoada ko‘proq qisqa oraliqdagi turnirlarda natija keltirishi mumkin bo‘lgan, pragmatik murabbiylarga tanlov qilmoqda, chog‘i.

Xayrulla aka eslab o‘tgan barcha misolga qo‘shilsa bo‘ladi va nega bunday degan savolga yuqoridagi sababni keltirgan bo‘lardim. Bunday holatda Ispaniya singari nodir misollar odamga yoqimli hislar beradi. Kuzatish yoqimli. Aksiga olib bu Ispaniya tarkib e’tibori bilan nomi eslangan Portugaliya, Belgiya, Angliya yoki Fransiyadan ancha ortda, menimcha.

Orif Tolipov.