11 yillik tanaffusdan so‘ng Italiya chempionligiga erishgan «Milan» klubi ustozi Stefano Pioli DAZN nashriga bergan intervyusida ko‘pchilikni qiziqtiradigan mavzularda gapirdi.
Eng yaxshi maqtovlar haqida
- Yigitlar meni quchoqlashganda, ularning hurmatini his qilaman. Ana shu eng yaxshi iltifotdir.
Jamoa haqida
- Natijalar o‘z-o‘zidan paydo bo‘lib qolmaydi. Jamoa ichida ajoyib muhit hukmron. Kiyinish xonasida ijobiy harorat paydo bo‘lsa, biz murabbiylar uchun ham ishlash osonroq bo‘ladi. Tajribali futbolchilarimiz yoshlarga yordam berishdi.
Mavsumning hal qiluvchi o‘yinlari haqida
- Ikkitasini alohida ta’kidlashni istardim. Birinchisi, derbidagi irodali g‘alaba. Ikkinchisi esa kubokdagi mag‘lubiyatdan keyin Rimda «Lasio» ustidan erishilgan ajoyib muvaffaqiyat. Aynan shu yutuq burilish nuqtasiga aylandi.
O‘zining shtabi haqida
- Bunday qobiliyatli yordamchilarim borligidan baxtiyorman. Ular menga har bir o‘yin bo‘yicha faqat kerakli ma’lumotlarni taqdim etishadi. Bizning o‘z kundaligimiz bor va unga jiddiy e’tibor qaratamiz. Meni to‘p nazorati mutlaqo qiziqtirmaydi, muhimi - hududiy ustunlik, yaratilgan imkoniyatlar, to‘pni qaytarish foizining yuqoriligi. Jismoniy holat bo‘yicha raqamlar muayyan futbolchilarning ko‘proq narsaga qodirligidan dalolatdir. Bundan tashqari, mashg‘ulot hissi ham katta rol o‘ynaydi va bu sizga yigitlar nimani his qilishayotganini yaxshiroq tushunish imkonini beradi. Tabiiyki, keyin xotirjam tanlov qilasiz.
Shogirdlar qalbini zabt etish haqida
- Kim bilan ishlayotganimni tushunishni xohlaydigan murabbiyman. Oldimda nafaqat futbolchi, balki haqiqiy odamlar turgandir, to‘g‘rimi? Yigitlarimdan ko‘p narsa kutaman, lekin men ham ularni tushunishni, istaklarini bilishni yaxshi ko‘radigan murabbiyman. Hammani tinglash orqali jamoani boshqarish bo‘yicha foydali g‘oyalarga ega bo‘lishingiz mumkin.
O‘z taraqqiyoti haqida
- Har doim ma’lumotlarga asoslangan holda ishlashga harakat qilganman. O‘zgarishlarga tayyor yigitlar borligini tushunganimda, o‘yin qadriyatlarini saqlab qolish muhimligini his qildim.
Yangi mavsum tayyorgarligidagi o‘zgarishlar haqida
- Yangi mavsum aksariyat o‘yinchilar uchun birgalikdagi uchinchisidir va bu tamoman boshqacha bo‘ladi. G‘oyalarimiz juda ko‘p va biz har qanday sinovlarga tayyormiz.
Keyingi mavsum haqida
- Biz juda ko‘p his-tuyg‘ular va ijobiy narsalarni kutamiz. Italiya va Yevropada o‘zimizni ko‘rsatish istagi bilan o‘ynashimiz kerak. Buning uchun albatta, qat’iyatlik va jiddiy tayyorgarlik kerak bo‘ladi.
MUHAMMADXON tayyorladi
