Ustozlar haqida yozib turaman, bilasiz. Bugun e’tiborimiz markazida Rixsitilla Umarov. Sportchilikdan sharhlovchilikka o‘tgan kam sonli mutaxassis. Rixsitilla aka voleybol bo‘yicha sport ustasi bo‘lganlar. Garchi keyinchalik universal sharhlovchiga aylangan bo‘lsalarda, voleybolga sodiq qolib, yirik turnirlarda birinchi bo‘lib shu turni tanlaydilar.

R.Umarov bilgan ma’lumotlarni Google va Wikipedia bilmaydi. Fenomenal xotira va faktlarni o‘z vaqtida qo‘llash uslubi. Ancha yillar oldin Rixsitilla aka bilan endi birga ishlashni boshlagandagi bir epizod: Andijonda Respublika darajasidagi katta sport o‘yinlari, yoritishga borganmiz. Hamma o‘z sport turlari bo‘yicha yangiliklar dasturi uchun reportaj tayyorlashi kerak (ma’lumotlar olinadi, yangiliklarga mos matn yozadi va ovozlashtiriladi). Montajga Rixsitilla aka kirib keldilar va shoshib turib 2 daqiqa navbatsiz vaqt so‘radilar. Hali matn yozmagansizku desam, qo‘llaridagi o‘yinlar natijasi yozilgan qog‘ozni ko‘rsatib - shu yetarli dedilar. Xop. O‘tirib o‘sha natijalar asosda xuddi matn o‘qigandek qilib reportajni bir urunishda ovozlashtirib, 2 daqiqada chiqib ketdilar. Vau deganimcha qoldim.

Lekin shu darajadagi ijodkor futbolga aralashmaydilar, zo‘r tushunsalar ham. Ichida yurmaganlari, to‘liq e’tiborlarini unga qaratmaganlari uchun. Buyam professionallik. Har bir sport turining ramziga aylangan sharhlovchilar bo‘ladi. Boksda Gendlin, basketbolda Gomelskiy va boshqalar. Rixsitilla Umarov, shubhasiz, voleybol siymosi. Yana ko‘plab sport turlari bo‘yicha kamyob sharhlovchi.

Fotolarda esa voleybol terma komandasi a’zosi bo‘lgan paytlari, Islom Karimov va Xalqaro Olimpiya qo‘mitasi hozirgi prezidenti Tomas Bax, o‘sha paytdagisi Xuan Antonio Samaranchni ko‘rishimiz mumkin.

Davron Fayziyev.