13 iyun, dushanba kuni Millatlar ligasi doirasidagi Fransiya hamda Xorvatiya terma jamoalari o‘rtasidagi uchrashuv bo‘lib o‘tdi. Uchrashuv xorvatlarning 1:0 hisobidagi g‘alabasi bilan yakunlandi.
Fransiyalik hujumchi Antuan Grizmann 80-daqiqada zaxiradan maydonga tushdi. 31 yoshli futbolchi uchun bu terma jamoa safidagi 108-o‘yin bo‘ldi. Bu ko‘rsatkich bo‘yicha Grizmann Zinedin Zidanga yetib oldi. Ikkalasi ham terma jamoada eng ko‘p o‘yin o‘tkazgan futbolchilar ro‘yxatida oltinchi o‘rinni egallab turishibdi.
Bu borada Grizmann eng yaqin bo‘lgan futbolchi Olivye Jiru bo‘lib, u 112 o‘yin o‘tkazgan. Fransiya terma jamoasi rekordchisi Lilian Tyuram hisoblanadi - 142 ta o‘yin.
