O‘zbekiston hamda Tailand uchrashuvidan so‘ng matbuot anjumani o‘tkazildi. Uning ikkinchi qismida O‘zbekiston milliy terma jamoasi bosh murabbiyi Srechko Katanets ishtirok etib, jurnalistlaring savollariga javob qaytardi.

"Bugun jamoam juda ham yaxshi o‘yin ko‘rsatdi, buning uchun futbolchilardan minnatdorman. To‘g‘ri, bizda o‘rtoqlik o‘yinlarida ham yaxshi o‘yin va yaxshi natijalar bo‘lgan edi. Lekin aynan bugun men jamoam ko‘rsatgan o‘yinidan to‘liq qoniqdim. Biz yaxshi pressing qildik, uchrashuv davomida tempni ushlab turdik, futbolchilar maksimal darajada tartibli o‘yin namoyish etishdi.

Osiyo kubogigacha FIFA kunlaridan unumli foydalanib, kuchli raqiblar bilan o‘yin o‘tkazishga harakat qilamiz.

Jaloliddin Masharipov almashtirilganidan so‘ng biroz norozi bo‘ldi, bu normal holat. Har bir futbolchi ko‘proq o‘ynashni xohlaydi. O‘zim ham futbolchilik davrimda ko‘pincha shunday qilardim. Hammani xarakteri har xil. Men uni ham tushunaman. Lekin men murabbiyman, ba’zida o‘yinga o‘zgartirish kiritish uchun liderlarni ham, xususan, Masharipov yoki Shomurodovni ham almashtirishga majburman. Bunda hech qanday muammo yo‘q.

Biz 4-4-2 sxemasini raqibga qarab tanladik. Har bir raqibga qarab bu joylashuv o‘zgarib borishi mumkin", — dedi Katanets.